55歲荷里活影星佐治古尼（George Clooney）自39歲人權律師老婆Amal被爆懷孕後，日前首度受訪分享做老竇心情！佐治表示夫婦感到好開心及興奮，又笑指：「最好笑嘅係，好多跟我同年紀嘅朋友，佢哋嘅仔女已經長大，仲離開屋企上大學。有次飯敍，同枱8個人話我一定會好享受做老竇，之後全部人靜咗，跟住有人扮BB喊聲，成枱人即刻忍唔住笑。」
佐治又指與老婆不會再四圍飛，以免有危險，自言不會再去南蘇丹及剛果，Amal亦不會去伊拉克。將來仔女長大要返學時，他會選擇在意大利、美國或英國定居。雖然佐治媽媽曾爆Amal懷龍鳳胎，但佐治自言不知消息從何傳出，堅稱未知BB性別。