負評當正能量Seasun高潮迭起
爆出驚人金句「有樓有高潮」、「冇樓唔好白撞」的Seasun，前日網上瘋傳疑似她在時鐘酒店拍攝的「私影」全裸寫真，成功出位。昨日Seasun穿三點式泳衣在九龍灣接受訪問，期間被發現右胸露乳暈走光，她說：「冇呀，我見唔到走光喎。（介意走光？）唔介意，靚就冇所謂。（有靚嘅走光？）走光可以好婀娜多姿，好似瑪麗蓮夢露條小裙咁飄吓飄吓。」她又自稱沒有整容，全身純天然。
睇網民反應拍露點寫真
對於網上流傳疑似艷照，她說：「唔回應喇。（覺得輯相影成點？）不予評論，希望大家鍾意我輯新相。（參考艷照甫士？）不如網民提議吓鍾意咩甫士，下次出寫真用。（用舊式電話、絲巾做道具？）都搵唔番啦，呢啲係極品，要好努力先去到嗰個境界。」她笑言視負評為正能量：「冇呢啲能量，我嘅工作好似一湖死水，你哋嘅投石喺我心目中泛起一個個漣漪，令我泛起更加更加多嘅高潮，好開心依家內心充滿高潮。」她自認拜金，笑言粉絲多到二千呎豪宅也不夠企。問到會否拍露點寫真？她說：「有冇人會想影我露點呀？睇吓網民反應。」
Seasun承認曾在趙苑瞓覺，問到是否與趙世曾同居？她說：「佢屋企大到不得了，下次帶你哋去。（同趙生咩關係？）佢都唔記得我，我想佢記得我，你哋幫幫手。 （你喺嗰度做咩o架？）喺佢屋企瞓覺、休息囉。（瞓咗幾耐？）每日冇幾多個鐘瞓，好多嘢做o架，但係佢唔記得我，我都唔記得喇。（同趙生有冇聯絡？）人哋大老闆，咁易聯絡o架咩？」其後她再接受電話訪問，問到可有與趙世曾發生關係？她說：「完全冇發生過你哋諗嘅嘢。」