江美儀同「囡囡」爭做女神
藝人江美儀、黃智賢及陳敏之昨日宣傳劇集《親親我好媽》，對於劇中飾演她囡囡的江嘉敏近日爆紅成網絡女神，美儀即說：「唔係我咩？江美儀定江嘉敏呀？」而嘉敏被指遭無綫雪藏，美儀建議她主動與公司拆掂。
江美儀、黃智賢（Ben）及陳敏之昨日到小西灣一間中學宣傳劇集《親親我好媽》，在劇中飾演夫妻的美儀與Ben，對於劇中的囡囡江嘉敏被指因為曾拍攝ViuTV節目而被無綫雪藏，美儀表示：「希望快啲解決咗佢啦！」
趁收視好快啲傾
Ben就指成件事只有公司與嘉敏最為了解，故要對方與公司溝通，美儀則說：「有同佢食飯傾偈，佢唔係同我呻，我叫佢主動同公司傾，趁依家收視好就快啲傾啦！」
談到嘉敏成為網絡女神，美儀笑說：「唔係我咩？江美儀定江嘉敏呀？佢真係清泉嚟o架，唔使點化妝，個樣又Sweet，拍嗰陣我哋都話佢得o架啦！」二人又相信她不會被雪，望事情盡快解決。
陳敏之不給兒子壓力
同場的陳敏之則指劇集貼地，易引起家長共鳴，初為人母的她直言會緊張小朋友，認為怪獸家長的出現某程度上是社會造成。談到近期有學童自殺，她表示覺得不舒服，亦會警惕自己不要給囝囝太大壓力。問到與老公如何協調教囝囝，她表示：「老公嚴厲啲，我就獎勵多啲，依家囝囝都有啲驚佢！」她又透露囝囝昨日剛滿兩個月大，見到囝囝健康，即使辛苦也值得。
文：影視組