阮民安想囝囝靚仔：似我把鬼！
有「樂壇小強」之稱的組合E-Kids成員阮民安（Tommy）升呢做爸爸，太太張倚雯日前為他誕下重七磅半兒子，更為囝囝改了一個好有霸氣的英文名Caesar，Tommy希望囝囝似媽咪咁靚，有自知之明的他笑說：「似我把鬼！」
去年底Tommy被本報率先爆奉子成婚，迎娶比他年輕十歲的模特兒兼網紅張倚雯（Eva），Eva昨日在ig公布囝囝已出世，並上載一家三口手疊手的溫馨照，她留言透露兒子在本月17日出世：「BB已平安出世啦，順產7磅半的B仔，二人出門，三人回家，感覺好奇妙haha！」Eva又形容生仔過程：「十級痛果然名不虛傳，爆發新力量，來回地獄也值得，手指長長的一家。」之後她再上載囝囝的靚仔相，見BB頭髮濃密，眼線長長，下巴尖尖，還有「小手瓜」。
不改爛Gag本色
之前一直不肯正面承認婚事及太太Eva大肚的Tommy，昨日在電話中心情靚爆，聽到記者恭喜他做爸爸，依然不改爛Gag本色笑說：「有咁嘅事？聽聞過，疑似係。（點解唔肯認做咗爸爸？）我唔係唔認，好開心，好感恩。（放唔低偶像包袱？）之前1月21日E-Kids開完騷，我就放低咗，變咗實力派歌手！」問到囝囝似邊個，Tommy笑說：「唔知，似阿媽好啲，似我把鬼！似媽咪靚女幾好。佢手指、腳趾都好長，好多毛，耳仔都有毛，有個尖尖下巴。」他又爆囝囝英文名來歷：「佢阿媽好鍾意睇荷里活啲英雄片，因為佢成身毛，佢阿媽諗起電影《猿人爭霸戰》嘅男主角Caesar（凱撒），就幫佢改咗呢個名，因為古羅馬帝國都有凱撒大帝，好有霸氣，好似好型。」至於中文名則留給長輩去改。
大讚Eva偉大
Tommy又大讚Eva是偉大的媽咪，因為生BB過程非常痛苦：「我覺得要表揚吓媽咪，好佩服好尊重佢。（你有冇入產房剪臍帶？）呢個我就唔想發表，唔想講太多。（你會陪Eva坐月？）都會，努力學習，佢又要餵母乳，既然我生理上未必幫到，都要做個男人負番啲責任幫手做吓雜務。」他又讚囝囝腳頭好：「E-Kids隔咗咁多年，仲可以返上舞台開騷，已經係奇迹。」
文：音樂組