「敗家大狀」林作瞓街被摑乜都制！
贏在射精前！呢個世代個個都想靠父幹，有邊個想有自唔在攞苦嚟辛？但總有人鍾意玩挑戰，林作偏偏有大律師唔做，反而紆尊降貴殺入娛樂圈搶飯食，寧棄律師袍同唔介意除剩under拍戲，執三攤拍「處男」微電影做瞓街敗家仔，仲啱啱被女當眾摑一巴，名副其實「裸」苦嚟辛！甘願成為最高Quali嘅老臨，連牛津尖子都嚟搶飯盒，啲老臨咪又少咗個飯盒？「讀書唔成先發明星夢」咁old school嘅諗法，依家的確唔啱用。你睇歌神許冠傑都港大出身，再講近啲謝安琪都一樣係港大畢業生，但佢哋同林作嘅分別，就係林作本身有錢有樓有家底！
擁3,400呎豪宅 唔驚冇高潮
喺牛津浸過嘅Joseph（祖洩）林作有一張黃金CV，莫道羅湖橋以南至界限街以北都無敵，晒喺中環蘇豪區一樣惹人艷羨。按照港女Seasun「有樓就有高潮」嘅理論，佢已合乎香港女性潛在意識嘅客觀鑽石筍盤要求，更遑論佢坐擁價值6,500萬嘅3,400呎豪宅，只要再做多八年大律師，累積夠十年經驗後，就有機會被香港終審法院首席法官委任成為資深大律師，此時佢都未夠四十歲，已登香港精英金字塔尖。
好老實，以林作嘅外表真係一啲都唔吸引，以佢嘅黃金CV，可以做名嘴或KOL都一樣有市場，但佢話晒係人生勝利組，學舊愛麥明詩話齋：「總好過麻木虛度！」可能佢見同自己差唔多外形身高嘅王祖藍都得，冇理由自己唔得囉！咁點解林作有自唔在攞苦嚟辛？點都要做娛圈插班生？甲之熊掌，乙之砒霜，三歲細路哥都識揀，何況係天才林作！
早幾日有個大狀朋友同我Nuts哥食Lunch先問我：「Well……你點知道有林作呢個人存在先？」「娛樂版囉，佢係麥明詩男友嘛！」「第一印象覺得佢點？」「係有腦嘅！」「Nuts哥，你幾時見過有大狀上娛樂版多過上法庭版？佢做得好啱呀，邊度成名咪邊度發圍囉，冇壞喎！冇話浪唔浪費嘅，但荒謬嘅係一個咁有自信嘅人，點解仲要搶茄喱啡呢碗飯食先？」
大紅大紫 冇人會話靠阿媽
其實都啱數喎！林作轉數快，又肯捱，最多咪喺娛圈混多幾年，叫媽咪開部大作圓夢，就叫《祖洩大狀》啦！搵麥明詩做女主角，駱應鈞做佢師傅，應該幾收得！Nuts哥敢寫包單你捱過二打六，一定冇人話你淨係靠阿媽！依家佢已經諗到用花弗形象，食住個勢出書教人用英文溝女，過兩年就憑三寸不爛之舌學黃子華開talk騷，做全方位藝人。去到2025年，林作放棄大律師執業第八年，那一夜舉行香港電影金像獎頒獎禮，當晚由周潤發頒最佳男主角獎座畀林作，最佳電影係《祖洩大狀》……如果林作人生劇本最後真係寫成咁，Nuts哥臨瞓刷牙前，必定抹掉一星眼屎，感動流涕。
Nuts哥