龐卓欣餵男友食好西 拍拖AA制
前港姐龐卓欣（Ada）昨日與「鐘錶大王」孫秉樞孫仔孫智威（Solomon）拍拖出席狗狗慈善步行。雖然男友是富三代，但她仍非常貼地，又笑言經常餵男友食正嘢，但就AA制，各自付錢食飯。有個咁正女友，難怪狗狗都當Ada是女神。
昨日Ada與Solomon帶同五隻愛犬參與慈善活動，兩人平日經常拍拖放狗，問到每次放五隻狗會否難以控制，Solomon笑說：「唔會，啲狗好聽話，當佢係女神咁，唔係講笑。」Ada解釋自己不時餵愛犬食正嘢，所以牠們會以崇拜的眼神望着她，問到會否餵男友食正嘢，她說：「我經常餵佢食正嘢，不過係佢自己畀番錢，因為我哋食飯係AA制。」
Ada自言一直想養七隻狗，自己現養有三隻，加上男友養的兩隻愛犬，已很接近目標，她說：「想養多兩隻，媽咪話我搬出去住先養，如果有錢搬出去住，會即時養多兩隻。其實男友有鼻敏感，每次嚟我屋企就腫到豬頭咁，但冇辦法，我叫佢食藥！」
傅明憲北極潛水
同場還有愛護動物協會會長傅明憲、郭秀雲、歌手陳逸璇、趙世曾女兒趙式芝及「四眼Cue后」吳安儀等，她們均帶同愛犬步行。傅明憲透露下星期將飛到法國滑雪，之後再飛北極潛水及考冰潛牌：「今次係我第一次去北極，潛完水會去芬蘭滑雪，一個旅程滿足晒兩個願望，如果可以睇埋北極光就最好。」
文：名人組