合唱完就 Bye？阿倫當Eason紙底褲

樂壇校長譚詠麟將於4月推出全新國語碟《欣賞》，跟中、港、台、星、馬不同歌手合作，其中五位分別是孫楠、Eason、五月天、陳潔儀及李幸倪（Gin Lee），歌曲近日登上港、台、星、馬四地音樂平台的榜首位置，成績不俗！校長表示找不同歌手合唱，是因為一直有很多喜歡的歌手，今次可謂衝破大家屬不同公司的難關。新碟用了兩年時間製作，預計用18個月宣傳，他笑言如抗戰三年零八個月般，又感激公司不計成本為他做碟，共花費七位數字。

訓話！咪再呻辛苦！

新碟每首歌都由校長為歌手度身訂造不同主題，如情歌、環保及勵志等，其中跟Eason合唱的《明天何其多》便記載了Eason曾受校長教誨的故事！校長說：「好多年前有次見到Eason，佢話好辛苦冇乜瞓，太多嘢做，我同佢講唔好咁講，依家搏殺期，做得幾多得幾多，機會喺你手，唔做就人哋做，到有一日冇人搵你就知！之後佢就醒咗，冇再呻過，所以唔好有個托辭去懶、話聽日先啦，因為明天何其多。（覺得依家嘅歌手係咁？）唔想佢哋行冤枉路，覺得辛苦就停落嚟，會錯失機會，娛樂圈風高浪急，食住浪頭就向前進，一停落咗浪底就永不翻身。」

校長又提到與五月天合唱擦出火花：「我係監製，諗住放手畀佢哋有另外一種唱法，佢哋一唱就已經同我軌道唔一樣，我本來喺月球，佢哋去到火星，所以我就將軌道變番過去，但中間過程好過癮。」談及新碟的突破，校長笑說：「最大突破咪要斟茶遞水囉！每一個過嚟，我都盡地主之誼帶佢哋食好嘢，以往人哋招呼我，今次我招呼人，但開心嘅。」

吓！你叫我呀？（設計對白）	阿倫曾向Eason「訓話」，寄語對方搏得就搏，不要因辛苦而停下腳步。	Gin Lee在阿倫眼中可謂小妹妹一個，所以並非合唱情歌！

再搞新組合？難咯！

問到Gin Lee是否合作歌手中最後輩的一個？他坦言都算是，故兩人不是合唱情歌。至於可會想跟這些歌手如跟李克勤般組個組合？他認為很難，並笑說：「呢個係一次性紙底褲，係一次性合作，我唔敢講將來，但要合作多幾次先有需求感覺。」

化妝：Eva Chuk @Faces make up studio

髮型：Perny Tang @Silkcut salon

文：音樂組　

攝：吳文聰