馬國明護心穎 Man爆：係我約佢！
藝人馬國明與黃心穎關係逐漸明朗化，前晚心穎大讚馬國明乖仔，直認彼此了解中，而馬國明昨日就Man爆保護「女友」，連聲否認「女追男」傳聞，透露約了心穎幾次才成功。
黃心穎前晚以性感打扮出席公開活動，再被追問與馬國明的關係時，她甜笑表示了解中，又指自己不會「分散投資」，拋下一句「得佢一個！」可圈可點。對於男方被指「悶蛋」，她更開聲為他護航：「佢乖仔、孝順，悶有悶嘅好。」似乎馬國明已成功俘虜芳心！
而昨午馬國明現身尖沙咀街頭出席「內絡必安神經傳遞大體驗」活動，吸引大批市民圍觀，他更打大腳板做神經傳遞測試，結果反應奇佳。對於獲心穎「確定地位」，馬國明精靈回應：「咁犀利？佢冇同我講，真定假？唔好老作喎！都話了解吓先啦！（狂讚你。）有人讚都開心嘅。（佢話得你一個？）我都唔會同時間約好多女仔嘅，不過我冇收到生日禮物喎。（你生日飯局都冇預佢，攜眷出席嘛。）冇咁快啦，都話了解吓先，但暫時未有再約，大家都忙。」
約咗幾次先得米
馬國明雖未有親口認愛，但當提到「女追男」時，他即Man爆說：「最唔鍾意呢樣，點解要講到女仔主動？我約佢，而且唔係第一次就得，約咗兩、三次㗎，要睇吓得唔得閒。（覺得心穎點？）佢係個幾爽嘅人，唔會扭扭擰擰。」問到近日換新車是否接載心穎？他說：「得我媽媽、家姐坐過，冇車過佢。（話你慳住換車。）我爸爸唔係有錢，我嘅嘢要靠自己，應使得使。我覺得係寶物沉歸底，我寧願畀人話慳，都好過畀人話做咗水魚，我買樓都係趁樓市回落嘅。」
揸84萬新車出巡
對於取車當日被追蹤狂拍，馬國明無奈地說：「換車係方便爸爸上落嘅，以前架車高身啲。嗰日我媽媽同姐姐唔想上鏡，一條街追住狂影，鎂光燈係咁閃好辛苦，希望大家幫幫手啦！」至於日前拍《深宮計》狂踩27小時，他解釋是要遷就米雪檔期，以及拍攝打戲花時間關係，但補充有關方面翌日已取消所有通告，讓演員們休息。
活動後，馬國明即駕駛其新落地、約84萬元的黑色平治靚車離開，見他驅車出巡前往銅鑼灣，把愛車泊於附近停車場後便急急腳步入該處商廈，逗留約兩小時才離開，拿着蛋糕的他直返其早前購入、約二千萬的太古城複式新居。
文：影視組
攝：追蹤組