陳嘉容遭電梯咬踭險拗柴

名模陳嘉容（Eunis）昨日亦現身澳門為ViuTV拍攝節目，巧遇來澳門工作的林志玲！兩人入行便認識，難得碰面當然自拍一番。撞到老友咁有運，但Eunis拍攝時就唔多Lucky，沿扶手電梯而下時竟被「咬腳」，六吋高踭鞋的鞋踭不慎攝入電梯縫隙，幾乎「拗柴」，她說：「嚇親啊！『啪』一聲攝咗入去，好在我靈敏冇仆親。如果有扣或紮帶嘅就危險，呢對鞋可以即刻抽隻腳出嚟，依家着住波鞋拍攝。其實對鞋仲着得，但要導演就吓鏡頭。（驚咗唔敢再着太高嘅鞋？）唔會！工作需要成日都要着，小心啲囉！高踭鞋令女性線條更加靚，要做嘢就要克服佢。」