欣宜吞防「負」劑愈噓愈打得
鄭欣宜憑《女神》早前橫掃四大頒獎禮，對於由「我最討厭」變做「我最喜愛」，她坦言是奇迹！講到好友吳業坤成名後反惹來不少負評，直言在噓聲中成長的欣宜稱已身經百戰，不會再理會負面聲音，決定做好自己！
歌手鄭欣宜早前在四大頒獎禮上共奪八個獎項，榮升大家的「女神」！她直言2016年很幸運，全靠大家喜歡《女神》背後的意思才得到好成績：「其實出呢首歌之前，行內有好多負面聲音，有好多我敬佩嘅老師都話呢個市場唔需要一首咁嘅歌，因為唔係情歌、主流音樂，但我冇被佢哋阻止，我好相信呢首歌背後嘅意思。」
早年大家對她的印象多是負面，近年總算獲得認同，欣宜說：「真係好大滿足感，可以由『我最討厭』變咗『我最喜愛』，真係奇迹，娛樂圈好難捉摸，我今年入行第9年，頭5年我花咗好多時間希望大家喜歡我多啲，但只會得到更唔好嘅嘢，到後來我決定唔理，反而得到大家認同，所以既然控制唔到，不如做自己鍾意做嘅嘢。」
太忙冇時間唔開心
好友吳業坤前年一曲成名，但隨即引來很多負評，甚至有指今年奪「我最喜愛的男歌手」時惹來噓聲，問欣宜可怕條路會如坤坤般變得難行？自嘲思想如60歲老人家般豁達的她說：「睇你點睇，可能好好彩嘅係，我係喺噓聲中成長，身經百戰，已經唔care呢啲，其實我喺叱咤完咗都有好多負面聲音，但唔緊要，因為我有努力，同埋無論點都會有噓聲，就算好紅嘅藝人都會有人唔鍾意佢，冇得控制，最緊要做好自己。同埋我好好彩，除咗音樂，我又有拍劇、電影、曲奇生意，冇咩時間諗唔開心嘢。」
紅館騷可遇不可求
欣宜稱稍後會宣傳電影《29+1》，之後到上海拍戲，亦會做新歌，更想再開騷，問可會想登上紅館？她說：「梗係希望，但順其自然，呢啲冇得急。紅館同結婚係一樣，冇得限定時間，要天時地利人和。」提到爸爸鄭少秋五月尾將開紅館演唱會，問她可會上台唱歌？欣宜說：「睇佢邀唔邀請我，但我嗰幾日好似唔喺香港。」有傳與關心妍自組公司？她說：「吓？唔會啦，我冇資格做呢樣嘢。」亦有傳欣宜會把唱片約轉投蕭定一旗下，她說：「多謝大家關照，我同星娛樂嘅唱片約喺上年我開騷嘅第一日已經完咗。（簽埋畀阿一？）未清楚，未傾，大家都忙。」
化妝：Samuel@江中平化妝室
髮型：Milk Chan@Xenter
Styling：Constance Lee
場地：hmv kafe
文：音樂組
攝：黎志輝