項明生想紅館開talk騷

旅遊達人項明生與「美心妹妹」楊鎧凝（Celine）昨日出席活動合唱賀年歌，他透露新年到郵輪登台做talk騷，除分享旅行經歷外，還要唱歌、跳舞及彈結他：「今次係我第一次做talk騷，除咗跳火圈之外乜都要做，真係搵食艱難，希望長做長有，最好做到去紅館。大陸已經有人搵我做，主題都係旅行，但會加入唔同元素，睇嚟遲啲要學埋魔術同功夫。（會倣效杜如風帶團嗎？）我嚟緊喺電台開咪請咗佢做嘉賓，會問佢做三陪（陪食、陪影相、陪買嘢）嘅經驗。我都有叫洪永城做，佢呢啲小鮮肉適合搞富婆團，我做唔到杜如風嗰種豪華團，我適合做遊學團。」