李家鼎不忿李錦聯抽水：鼎佢滷味
藝人李家鼎昨日到屯門出席活動，談及名廚李錦聯笑言二人合作名為「鼎李滷味」的食肆，李家鼎嬲爆直斥對方抽水，更以「味」還「味」說：「我真係『鼎佢滷味』！」
於《阿爺廚房》大顯廚藝的李家鼎，昨日與藝人金剛、Kawaii及關伊彤到屯門V city出席「賀年『口』多福」活動，李家鼎即場以豬肉作食材，製作名為「福袋」的賀年食品，新鴻基地產代理有限公司租務副總經理孫雅茵小姐試食後讚口不絕，之後，二人又與金剛合作炮製「撈起」，祝各人撈到風生水起！
加埋百幾歲話都費事
李家鼎被問到李錦聯笑言要合作搞食肆，他即鬧爆對方：「黐線！佢抽我水，嗰日佢話影張相，我冇所謂，點知爆啲咁嘢，話咩『鼎李滷味』，我真係『鼎佢滷味』！我唔鍾意，流嘅！（佢想搞笑？）搞笑唔係問題，但我完全唔知，大家加埋百幾歲，我話你都唔好意思啦！（同佢傾番件事？）算啦，嗰日佢都同我講：『鼎爺，我抽咗你水呀，嘻嘻』！（情願自己搞生意？）何來巨款？公司嘢唔使做？我對自己搞生意嘅興趣，20個巴仙都冇，壓力好大！但近排係多咗人搵我傾合作，睇吓點先，按部就班！」問到是否不介意與兒子李泳豪前女友楊思琦合作？他說：「若果公司要咁安排，我冇法，照做，唔會打爛人飯碗！」
而李錦聯透過電話回應說：「鼎爺係咪忙得滯睇漏咗？我係話『建議』開一間咁嘅舖，當日個廣告都係我向老闆建議搵鼎爺啦！（佢話『鼎你滷味』，嬲唔嬲？）唔會，我哋好老友，係囉，咁叫佢快啲開間啦！」
200磅金剛肥到Cute
同場戒煙後暴脹的金剛說：「就嚟二百磅，好多女仔唔敢同我一齊行，我個胸大過佢哋，我C Cup！但依家覺得Cup數擺第二，性格擺第一，溝通到就OK！（阮小儀啱Feel？）人鬼殊途喎！做Friend好過！（你有機會喺佢心目中贏到余文樂？）贏梗！我有胸部，佢有胸『雞』（肌），唔同Style。（戒煙後多女埋身？）冇，我肥到Cute得滯！」Kawaii及關伊彤則異口同聲希望今年可以涉足飲食業。
文：影視組