「拖」足十年 洪卓立雞年娶湯怡
洪卓立（Ken）近年不停被追問何時與女友湯怡拉埋天窗，由於兩人正值事業搏殺期，故每次均以「過多兩年先」作回應。Ken日前孖好友鍾舒漫（Sherman）為慈善活動宣傳，現場擺放巨型求籤筒，Ken及Sherman分別抽到「甜甜蜜蜜、攬到實一實」及「捕獲鑽石王老五、以後買嘢唔使本」，Ken抵死笑說：「支籤幾準吖。」搞到單身的Sherman大叫好冧。
Sherman好恨嫁
問到會否於雞年迎娶女友，Ken直認有意結婚：「一嚟拍咗十年，大家係咁催。」不怕被指拖對方十年青春？他說：「呢個講法好錯，上網見到好多人話我拍十年都唔畀名分人，呢個係好錯嘅觀念，結婚唔代表唔分開，只係所謂嘅見證，唔結婚係咪代表唔會一生一世呢？大把人到老都冇結婚。」
Sherman則認為每個女仔都想披嫁衣：「湯怡雖然事業心重，但唔代表佢唔想結婚。」自與吳浩康分手後一直單身的她說：「支籤幾啱我。（雞年要搵男朋友？）係啦，承你貴言。」
場地：黃大仙中心
文：音樂組
_