烈女千嬅叫還債 鄭中基緊張散晒！
鄭中基（Ronald）請得分手十多年的楊千嬅擔任紅館個唱嘉賓，舊情侶世紀同台，雖然Ronald的妻女及千嬅家人都在場，但兩人又拖手又擁抱合唱，千嬅指Ronald請她「有吉士」，更反問：「碌（友情卡）咁大點還呢？」「大」到Ronald喊成身「散」晒。
鄭中基一連四場的《PLAY IT AGAIN世界巡迴演唱會》前晚舉行第三場，太太余思敏與囡囡Emma、黃心穎、黃心美、黃美棋與男友鍾健威、張達明、楊千嬅媽媽及弟弟等捧場。一如本報率先爆料，舊情人千嬅於encore時驚喜登場，令全場起哄。兩人於1999年相戀，但分手後未曾同台演出，當兩人合唱《製造浪漫》時，千嬅突然兩度甩嘴，之後兩人邊唱邊揈手，要求觀眾起身，最後來個「愛的抱抱」。自爆好驚的千嬅說：「做咗廿年紅館都冇咁驚，我成個ear mon爛咗，有冇人可以幫我救番？頭先啲音冇事嘛？」Ronald說：「你頭先嗌停嘛！」千嬅指不是主場故不敢開聲叫停，被Ronald指她是烈女。
助戴ear mon
千嬅更重提Ronald大前晚不識唱《烈女》被噓的瘀事：「你仲敢提《烈女》？你尋晚賴嘢喎。」千嬅問歌迷是否恨聽她的歌，再說：「叫我唱嘛！你哋擺明想整佢啦！大家買咗今日呢場真係行運！」當她戴新ear mon時，笑言自己左右不分，Ronald糾正她並想出手相助，千嬅就笑到踎低說：「唔使喇，呢個我助聽器！點解咁大膽請我做嘉賓，碌（人情卡）咁大點還呢？你可以攤好長嘅還款期，我幫你諗埋點還！」還提議他可分期還人情債：「將你嘅歌還畀我，戲唔使拍得多，最緊要中！」
嘲有齊「中女三寶」
追完Ronald「數」後，千嬅問他攞水解渴，當知他只飲暖水時，又笑他：「已經去到飲暖水？係咪仲有頸巾同潤手霜，齊晒？好驚呀，你有中女三寶！」兩人唱完《閉目入神》便拖手抱抱，待千嬅落台後，Ronald回神後說：「突然唱到成個人散咗。」似乎跟千嬅同場相當緊張。
Ronald指兩歲時因鍾意《Sha La La La》，結果其父揀了此歌由溫拿翻唱，令溫拿爆紅，所以他說：「溫拿死喇，爭我好多嘢！」到唱出《無賴》前，Ronald澄清索取門票的前度並非楊千嬅及蔡卓妍：「我唔止嗰兩個，唔好睇小我！」