薛凱琪瞓身試愛 吳千語玩異地戀

蜜運中的藝人吳千語今年農曆新年與男友林峯分隔異地，身在北京拍攝奇幻電影的她，出發前聯同師弟栢天男拍攝賀年專輯，透露將於當地逗留三個月，戲中演擁有魔法的仙女，有不少動作場面，故開拍前要做足準備，既要搵北京老師練國語，又要進行連串體能訓練，她謂：「其實我應該要增肥，但試過一段時間狂食嘢都冇用，惟有體能上補救，今次同王力宏、高以翔合作，細個好鍾意王力宏，所以都幾期待。」

買禮送準奶奶

問到男友可會前來探班？千語嘴扁扁表示對方一日假期也沒有，所以二人已率先出外度假。問到是否感情已踏入穩定期，故毋須經常見面？她說：「都係，好耐冇見，各自有自己嘢準備，但新年都會買定嘢送畀auntie同uncle。（結婚未？）我想像唔到做媽媽係咩款，都未搞掂自己，所以喺30歲前唔會諗。」問到雞年有何願望？千語說：「想試吓半年香港、半年內地工作，第時有家庭未必可以咁樣。」

至於加入公司半年的天男表示將參與首部電影，由於廣東話不太純正，每天咬木塞練廣東話外，也有找老師學演戲。

吳千語祝大家生意興隆，賺到盤滿缽滿。

栢天男攞起炮仗，嚇親身邊的吳千語。

生肖屬雞的薛凱琪（Fiona）日前率領師弟馬志威、鄭紫平及灰熊寫揮春應節，當中不擅長寫大字的Fiona以愛心畫「過關」，三位師弟則寫下「雞籠入水」、「雞星高照」及「龍雞精神」等過癮賀詞！

以往工作第一的Fiona自爆希望今年投放更多時間及心機去拍拖：「當你遇到真愛，無論你幾忙都會有放工嘅一刻，點都可以相聚！我可以身兼幾職，唔一定要工作行先。（潛力對象？）冇，要睇緣分。（同富二代鄧浩基傳緋聞？）佢係我由中學到依家嘅好朋友。緋聞娛樂到大家冇所謂，但成日害到朋友，好多朋友仲驚過我！」Fiona自認幸運，皆因她出道至今從未收過「戀愛禁令」，更被經理人黃柏高（Paco）催促搵男友，她說：「我好幸運遇上開明嘅經理人，其實要我拍好戲同唱好歌，我家庭同愛情都要幸福，我太耐冇愛情，都會渴望。」渴望愛的她希望今年推出更多有愛的作品，並推出國語大碟及舉行小型個唱。

已有一段時間沒拍拖的薛凱琪，自爆雞年最想搵個男朋友。 場地：華嫂冰室 薛凱琪服裝：alice + olivia 薛凱琪化妝及髮型：Jessica Chan@Jessica Chan makeup workshop、Joey Hui@hair culture	薛凱琪逼三位師弟擺Cutie甫士，場面搞笑！	（左起）鄭紫平、灰熊、薛凱琪、馬志威 三位師弟拿起揮春，薛凱琪則以愛心畫祝大家覓得真愛。

師弟大整蠱

三位師弟其後夾份整蠱師姐Fiona，裝腔作勢要「揼」她，結果Fiona「發雌威」逼三人擺出心心Pose扮可愛，場面搞笑！而馬志威及灰熊均表示有意挑戰演喜劇，至於有功夫底子的鄭紫平則希望有機會多演內心戲。

文：影視組

攝影：張福宏