梁烈唯校啱時「猴」年三十晚做老竇
37歲藝人梁烈唯（唯唯）與太太駱保雯（Tina）於2014年結成夫婦，去年更宣布太太有喜。昨午，Tina在唯唯陪同入養和待產，直到傍晚約六時許，梁烈唯向等候的傳媒報喜，指太太誕下「猴女」Karina，正式榮升爸爸！
年三十晚初為人父的唯唯在醫院門外受訪時表示，因為太驚故未有親手剪臍帶：「感覺好快就生咗！自己喺產房企側邊唔知做乜好，到醫生話BB就出嚟，我先意識到拎手機出嚟影相，再去太太身邊分散佢注意力。直到醫生問我睇唔睇吓，我仲反問佢睇咩？先知個女真正出咗世，抱住佢嗰吓感受好深。」
唯唯又表示目測女兒重約7磅，問到Karina似爸爸定媽媽，他說：「有家人話似太太，有人話似婆婆，有人又話似我，似邊個都冇所謂，最重要健康快樂。好多謝太太咁辛苦，當我一聽個女把聲咁嗲，我知一定會好錫個女。」另外，堪輿學家陳子才指Karina特別旺爸爸的財運：「個女五行屬陽木，屬『財官格』，未來可能從事同財務及管理有關嘅工作。」
_