張智霖戒口操Fit 全力「孵雞仔」
型男張智霖猴年工作繁多，保守估計帶來億元收入進帳，踏入雞年未敢放慢腳步，全力向影壇出擊！談到追生「雞仔」，身為「愛妻號」的他笑言會「配合太太」，希望家中再添多位港姐或小Cool魔，並預告倘若太太有喜的話，自己亦會停工一年照顧。
去年工作排山倒海而來的張智霖（Chilam），主持內地綜藝節目、拍戲、拍劇及廣告代言等忙到爆，笑言全年只放得約兩星期假！不過有付出自然有回報，Chilam荷包豬籠入水，有估計全年收入逾億！踏入雞年的大年初一，Chilam繼續「丁財兩旺」，被問到收入億億聲，他引用《周易》卦辭解畫：「實際（收入）就唔好講喇，但我相信『天道酬勤』呢句說話，總之機會係留畀有準備嘅人，做人千祈唔好懶！」
預告停工一年陪產
Chilam自言職責是娛樂大眾，多謝粉絲多年來的支持，並承諾雞年不會放慢腳步，目前已落實接拍三、四部電影，集中火力攻影壇！近日，他便為支持港產片製作而自毀帥哥形象：「戲入面我扮演的士司機，負責『處理』林家棟嘅遺體。為配合角色造型，我自行增肥十幾磅，夜晚有覺又唔瞓，經常諗啲負能量嘅嘢，去到片場塗黑個眼圈先埋位！依家煞咗科，過年就唔可以再饞嘴，我希望戒口同做運動下快啲回復原本嘅我。」
提到太太袁詠儀（靚靚）今年上載年花禮物並留言「再添人口」，Chilam是否已為添「雞仔」而努力中？他直言不諱：「作為佢（靚靚）嘅另一半，除咗我冇人幫到佢，咁我唔應該拒絕佢嘅！不過家庭成員數目係上天賜嘅，所以凡事平常心啦！」他坦言自「兒子」魔童出生後，發現培育一個小朋友所花的心血很多，但自己亦從兒子身上獲益良多。Chilam又指倘若靚靚成功有孕，自己會一如上次宣布停工一年！至於會否打亂工作安排？大智若愚的他笑說：「咁真係要協調嘅，但點都係好事同喜事嘛，相信大家會明白。（生番個女同媽媽一樣成為港姐？）哈哈！真係承你貴言喇！」
Ready幫靚靚送外賣
身為「愛妻號」的Chilam難忘靚靚懷魔童時口味突變：「女性懷孕周期無論情緒同胃口都同平日好唔同，係需要照顧嘅。佢試過半夜三更想食某啲嘢，我好樂意做外賣仔，喺物流方面幫吓手。如果再有嘅話都算有經驗喇，唔會再咁踢腳囉！」相信Chilam在心理上已做足準備，與靚靚一齊「孵雞仔」，加油啊！
文：影視組
攝：劉智源
髮型：Vic Kwan@ii Alchemy
化妝：Hetty Kwong
服裝：Ted Baker
場地：ii Alchemy