高Ling着紙尿片打底 任人搣籮柚
楊明與高海寧（高Ling）在無綫劇《抱佣情人》首次擔正男女主角，高Ling更為「女一」豁出去，既要半裸被吊樹上，又要被鹹濕佬搣籮柚，認真犧牲色相！為免蝕底，高Ling自爆會着定紙尿片護籮柚。
無綫藝員楊明、高海寧、黃淑儀、黃德斌、陸永、湯洛雯、古明華及張嘉兒等，昨日在將軍澳電視城為新劇《抱佣情人》拜神。高Ling與楊明首次齊齊擔正男女主角，兩人坦言壓力巨大。高Ling在劇中更搏到盡，犧牲色相，慘被鹹濕佬搣籮柚之餘，又要意識上半裸倒吊在樹上，還要在冬天拍攝落水戲，她笑言：「劇情需要都要犧牲，未知安排點樣拍，搣籮柚戲會着紙尿片墊底，相對咀戲變咗好小兒科嘅動作戲，哈哈。」高Ling指首次任「女一」壓力甚大，未試過長時間開廠拍攝，心情緊張：「戲裏面好cool，成日鬧人，要keep住個energy。」
楊明升呢high爆
至於在劇中演地產狂人的楊明，表示做男主角要花更多時間揣摩角色：「角色情緒好高漲，不時會狂嗌，拍之前會聽Jazz歌，等腎上腺素上升，保持高漲情緒。」楊明又指與高Ling有咀戲，雙方已經溝通過。
不忿女友被問價
問到女友莊思明早前在網上被問價，楊明笑言：「正呀！我都喺網上問嗰個人，叫佢問我價，開莊思明200萬，我希望有300萬，我有本事賺呀！等我幾拳搞掂佢，哈哈！網上有啲人就係咁無聊。」問到新年會否去馬來西亞跟女友莊思明的父母拜年？他說：「佢哋新年會嚟香港，當然會同佢哋拜年。」
文：影視組