栢芝大懵失財 係時候學放下！

Nuts哥覺得呢單Case最爆嘅唔係個外傭偷嘢，而係佢透過律師求情嘅理由，話栢芝成日唔喺屋企，財物四圍放，日對夜對受唔住誘惑，所以一念之差而犯案。呢個都算係求情理由嘅話，咁當年賊王葉繼歡都可以話：「係間銀行成日打開門引我打劫咋！我想（口架）？」再簡單啲，你將架車泊喺街邊，係咪偷你架車就係應該先？對於月薪四千蚊養全家福祿壽嘅外傭嚟講，日日對住咁多金銀珠寶，動吓心在所難免，不過直情去偷去搶，梗係大錯特錯啦！

外傭乘虛而入

當年以摸頂價1.8億買入世紀大廈嘅栢芝確係大把水，好似佢其中一部經典作《最愛女人購物狂》嘅購物狂角色咁，成日鍾意買嘢，喺佢身上永遠都會見到最Hit嘅潮物，聽聞佢對助手或屋企人一樣疏爽！估唔到佢啲金銀珠寶衫褲鞋襪，就好似部戲咁仙女散花四處擺，真係財「散」人安樂！兩個月內被人偷走咁多嘢都唔知，證明栢芝嘅性格豪爽同不拘小節外，對呢個外傭都相當信任，先至咁冇防範，否則薯片都偷唔到一塊啦！如果個外傭唔係因為離職而要檢查行李，睇怕栢芝永遠都唔知畀人偷咗咁多嘢！當然，明知臨走時十居其九都會被人檢查行李，嗰位外傭都係笨賊一名！

話時話，其實栢芝都要負責任，警訊講到口都臭啦，財物勿亂放嘛！唔係以為自己住到大廈頂層就冇人會膽生毛爬咁高入屋爆竊嘛？所謂日防日防，家賊難防，更何況係一個非親非故嘅外傭？經一事長一智，送官究治唔係完美嘅解決方法，栢芝都要改吓財物通屋擺嘅隨心兼大懵作風，以防小偷再現。栢芝大可鑽研近年勁Hit嘅「斷捨離」人生術，間屋整齊啲，錢又慳多啲，人又變靚啲，又可以成為一對囝囝嘅好榜樣，一舉多得！

減少無謂欲望

「斷捨離」係乜？就係提倡減少欲望同放下欲望，衫褲鞋襪金銀珠寶無需要太多，夠用就得，同時將執拾變為習慣，減少無謂嘅消費，唔好見靚嘢就買。入門就係由執屋開始，之後再升呢套用喺生活同人生上。好簡單，一件唔着擺到黃晒嘅衫，不如扔咗去唔使阻住晒，又或者啱用先買，唔好一時衝動為買而買；同樣，為一個唔值得或已經唔再愛你嘅人，再嘥時間去等或引對方注意，只會勞心勞力兼擾民，搞到自己冇時間花喺重要嘅人同事身上，為乜呢？放下，先令自己舒服自在。

好似早排王菲開騷惹來唔少批評，竟然引起栢芝粉絲同王菲粉絲喺網上開火互罵，其實栢芝同霆鋒各自展開新生活，你有你嘅生活，我繼續我嘅忙碌，你睇栢芝去到世界各地邊度都好，都成日被人影到同兩個仔食玩買，就知佢有幾咁忙碌啦！霆鋒同王菲就愛到天崩地裂，得閒拖吓手仔散吓步！大局已定，班粉絲係咪應該都要「斷捨離」呢？