陳庭欣攬桃花求Mr.Right
前港姐冠軍陳庭欣昨日到維園行花市，期間不停被大人細路包圍合照，人氣十足！行到花檔時，庭欣興奮地攬實超巨型桃花影相，擺明想新一年行個桃花運：「行花市絕對係人氣測試！可能最近有主持《東張西望》，劇集《致命復活》反應又好，所以有好多人同我打招呼。」
講到新年大計，庭欣表示最近已接連參演兩套劇集，不久後又會參與大製作《深宮計》：「最緊要梗係身體健康啦！記得舊年年初一病到冧廠，所以今年要健康！」愛情運方面，她笑言風水師麥玲玲曾指點尚未有真姻緣，但今年踏入「三字頭」，希望找到Mr. Right，因此不介意參加Speed Dating識新朋友：「有啲心急，真係要落力啲睇多兩眼！」
