莊思敏又被問價100萬過一夜

貴為拿督女兒的藝人莊思敏出席活動時不時展露勻稱身段，豈料因而招惹到不必要的麻煩，不時被人「問價」，令她不勝其煩！她昨日自爆再被問價，在社交網貼上憤怒圖案，並留言表示：「玩玩玩，有咩咁好玩呀。」同時上載一幅對話截圖，相中見有人留言問「100萬玩一夜幹不幹。」雖然內容未有說明要做甚麼，但已觸怒莊思敏，她嬲爆回覆：「找其他人玩吧。」

「好煩又滋擾！」

莊思敏受訪時坦言再次被人「問價」：「以我所知，呢個人係第一次傳訊息過嚟，但呢啲人成日改名，都唔知係咩人！我成日覺得問價好唔尊重，同埋佢哋成日都追問，真係好煩又滋擾！你唔覆，佢又不停追問，你覆佢，佢又不停確認你（意願），佢哋活喺自己嘅世界入面。我當然唔會理佢哋啦，得啖笑！」

感覺受辱

其實莊思敏已非首次被問價，兩年前曾收到「粉絲」以電郵讚她演技出色，揚言願意支付10萬港元與她共度春宵，莊思敏笑言對方出手低，亦相當氣結。去年，網上盛傳她因買股票輸掉5,000萬港元而要「陪瞓」，令不少人借勢向她問價。提到「身價」在兩年內由10萬躍升10倍至100萬，她無奈地說：「個升幅係幾唔錯，但係咪要開心呢？我覺得好侮辱囉！」

文：專案組