胡琳貓咪世界盃 巴西vs阿根廷
歌手胡琳愛狗也愛貓，家中養了兩隻貓貓Argentina（白鼻）及Brazil，指愛貓是她的生命泉源：「只要有佢哋，就算我一個人住都唔會覺得寂寞，因為我知屋企有兩隻小鬼等緊我，就算我工作幾辛苦，但一返去見到佢哋，就會乜辛苦都冇晒。」
Argentina和Brazil是在愛協收養回家的唐貓，問胡琳為何揀貓不揀狗？她說：「其實貓、狗我都鍾意，只係我考慮到狗要定時陪佢散步同比較黐身，我怕冇咁多時間陪佢，所以揀咗貓。貓性格獨立，識自己大小二便，我工作忙，養貓會好啲。」至於Argentina和Brazil的名字由來，與胡琳記性不好有關，她笑住話：「Argentina係阿根廷、Brazil係巴西，嗰年打世界盃，我好鍾意呢兩隊球隊，所以用呢兩個國家嘅名。咁我就記得佢哋邊年嚟我屋企，佢哋到底幾多歲。」
原來Argentina和Brazil已是胡琳第四及第五隻貓，有謂貓性格太冷漠，胡琳不認同：「貓其實都好嗲，只係佢有時唔想理你，你叫佢五十次，佢哋都攤喺床度唔郁，但有時佢哋好熱情，令你好冧。」
