陸永曾經兜踎 自嘲過客 唔敢囂

街坊叫錯6號

陸永曾經在夫子自道之作《456Wing》中，自嘲「有人話我似阿Rain，又話我似祖名」，時至今日，他坦言情況已經有所改變，他說：「入咗TVB之後入屋咗，一定啦！依家出街啲觀眾一定會認到你，不過佢哋唔係叫我『陸永』，而係叫我『6號』（陸浩明）！呢個情況發生咗太多次，每日喺街度叫我做『6號』嘅人，仲多過叫我『陸永』，搞到我都要畀啲創意我自己，由初頭我諗諗埋埋好多好有創意嘅應對，到依家我凡聽到人叫我『Hello，6號，影張相吖！』我就會話：『唔影！你返去同人講我好寸！係唔影呀，點吖？』我明白嘅，做電視，高、瘦又戴眼鏡，仲要姓陸嘅，佢哋點會覺得會有兩個咁嘅人？講都唔信啦！所以佢哋搞唔清你兩個，6號都話耐唔耐就有人同佢講：『你個女好得意喎！』佢都被人搞錯叫陸永。（介意被搞錯？）只要搵我做嘢嘅客戶唔好錯就得，其實就算客戶嗌錯我都唔緊要，最驚乜都準備好晒，到我嚟到，佢哋話：『乜你嚟嘅？』驚客戶到時尷尬！」

陸永、C君（右）和鄭裕玲奪無綫頒獎禮的「最佳節目主持」。

陸永指兩個囡囡對自己的作品完全零興趣。

笑C君撐爛底褲

陸永在無綫劇《殭》中，角色名叫「C君」，但陸永斬釘截鐵說：「唔會有人認錯我係C君，冇可能認咗我個樣係C君，我肯定同C君唔似樣，只不過有時觀眾分唔清邊個叫咩名，咁唔係認錯你係另一個人。（同C君多咗各自工作係好定壞？）好！以前一齊做嘢，大家認識嘅世界係一樣，接收嘅嘢係一樣，會有局限，依家分開各有各去接收完，再一齊分享，就好似你打機打外掛程式咁，變得多咗經驗值。（同C君識於微時，特別好交情？）以前成日聽啲藝人講：『戶口一百元都唔夠，要借錢先開到飯！』輪到自己經歷過就發覺冇乜特別，玩音樂嘅都好窮好窮！上一代歌手話底褲都要兩份着，係真！（你同C君底褲兩份着？）好想好想試，不過唔啱Size，被佢撐爛晒！大把人戶口都撳唔到錢，好多普通打工仔月尾都會，所以唔使掛口邊！」

陸永

陸浩明

阿女唔吼老竇傑作

陸永由好窮好窮，做到今時今日歌、影、視、主持都見他蹤影，他說：「咁多嘢裏頭，最感興趣一定係音樂，而好鍾意嘅就係拍嘢，最好玩就係主持，係㗎，我講晒㗎！我唔係話我做得好好，但根本上你唔鍾意做，係唔會做得好！尤其呢行，我好少聽到人話：『其實我唔鍾意做㗎，為搵錢咋！』其他行業都會有人話『我唔鍾意份工！』但娛樂呢行，你做得一定係鍾意，有啲甚至搵唔到食，但都係好鍾意做，呢個就係佢吸引之處。（有冇人係睇完你做電視，至聽番你唱歌？）有，乜都有，但做人唔好太睇重自己，你自己梗知自己歷程，但你喺人哋生命中，你算係咩？你只係超級過客！人哋唔留意你好正常，唔使在意，不如做好每日工作！」

黃智雯與陸永在《流氓皇帝》中合放笑彈。

陸永早前與張繼聰（左）和蕭正楠合作拍《幕後玩家》。

唔怕傳緋聞

陸永囡囡Hannah曾因《城寨英雄》花曼（王君馨飾）慘死而睇到喊，但陸永說：「我兩個女完全唔睇我演嘅劇，唔係我唔畀佢哋睇，係開埋畀佢哋都唔睇，佢哋最多只會話：『喂，你呀！』之後就做其他嘢。我老婆會睇，有我演嘅都會睇，佢始終要睇吓個老公唔見咗半年，晚晚話開夜，你話就係？佢要睇囉！但佢睇完都冇乜意見，對住專業嘅人，唔會有太多意見，始終我比佢專業！（老婆擔心你同女演員日對夜對？）好公道嘅！我開夜，有家用返，開夜得嚟冇家用返，就好值得投訴！況且我情況好啲嘅，唔通懷疑我同嘟姐（鄭裕玲）咩？」

後記：夥拍嘟姐早15分鐘先叫準時

陸永與C君夥拍鄭裕玲做主持，近年成為幽默風趣的保證，早前更捧走《萬千星輝頒獎典禮2016》的「最佳節目主持」，比艾粒夥拍鄭裕玲的效果更佳，陸永謙虛說：「我都聽好多艾粒同嘟姐嘅電台節目，其實農夫、艾粒都係兩個騎呢怪，被嘟姐鬧、糟質、踐踏！都冇得話點樣再加啲色彩，因為農夫呢兩個人就係咁抵畀嘟姐踐踏！」

陸永大爆幕前惡狠狠鬧人的鄭裕玲私下真實一面：「嘟姐要求就係快同順利完成，即係話唔可以遲到，我同C君不嬲唔遲到，依家仲練到比嘟姐早到十五分鐘，先叫準時！早到半個鐘，至叫早到！唔係話我哋同嘟姐做嘢先變乖寶寶，而係我哋不嬲都係咁樣做嘢。嘟姐幕前好似成日鬧我哋，其實佢平時當每個人都係平輩咁傾偈。當所有人都係平輩相待，有咩人可以做到？只得佢！我都要向佢學習。」

文：影視組

攝：鄭家俊