甄子丹跳橋命懸一「線」
影星甄子丹昨晨出席主演西片在香港的記者會，今次獲荷里活影星雲狄素誠邀合作，子丹絕不欺場，自爆曾玩命跳橋，更形容今次拍攝「上山落海」：「嗰場跳橋戲，我去到連位都唔試就拍，當時成個人只靠一條好幼嘅威吔吊住，下面冇嘢保護㗎，對面睇拍戲嘅粉絲以為我真跳落去。劇組亦有好多我嘅粉絲，我覺得唔可以衰畀人睇，不過就叫助手拍Video做紀錄，當時心諗千祈唔好『瀨嘢』，拍完先敢打畀老婆（汪詩詩）備案！」
讚雲狄素啱傾
子丹與雲狄素一見如故成深交，戲中卻連場對打，談到今次合作，子丹笑說：「佢係監製之一，佢起初搵我上佢公司傾，一上到去我已經見到自己張相。我同佢講唔好醜化華人，當然最終劇本我好滿意。我哋依家保持聯絡，過時過節有互傳短訊同禮物，佢嘅小朋友好得意，成日叫Uncle Donnie（子丹英文名）。」
只紋老婆上身
戲中子丹的左前臂印有假紋身「最強」二字，他笑指是導演構思：「佢原本想紋晒『宇宙最強』添呀！（考慮真紋？）唔好，我得一個紋身，就係我老婆個名。千祈唔好認第一呀，冇着數呀，拍戲就話啫！」
文：影視組
_