周冬雨魔咒 找數3年 余文樂認愛即中招

生活質素升呢，余文樂溝女同買車一樣，愈追愈升呢！早排佢被踢爆同台灣皮帶大王嘅千金王棠云拍拖，去台灣食碗牛肉麵，去美國就鋸個扒，拍拖搭飛機多過行路咁滯！我Nuts哥絕對唔會懷疑佢今鋪玩認真，皆因佢出奇地自行招供放閃，大晒同王棠云睇日落嘅相，仲風騷到用雞腸留言：「invincible，the brighter future！」呢句英文解讀係為：「無敵，光明的未來！」但我Nuts哥睇到嘅係：「正嘞呢鋪，一天光晒啦！」點解？擺明王棠云呢條皮帶勒到樂仔都好實吓，分分鐘成為皮帶大王女婿，由元朗NBA Fisherman Lok升呢做皮帶大王女婿喎，仲唔一天光晒咩？點知，就係捉蟲嘅開始！

網民鬧爆吸金抽水

因為余文樂舊年返內地拍戀愛真人騷，同細自己11年嘅周冬雨做情侶，仲話佢哋假戲真做擦出愛火花，曾經錫晒面珠肉緊到玩互咒，周冬雨話：「三年之內除咗我，其他人睇你唔上眼，仲要嚴重到見到你就走！」余文樂就咒番周冬雨：「你呢三年日日都會掛住我，但又唔會見到我，掛死你！」雖然話係節目效果啫，但真係唔好亂咁發誓落咒，個咒語太強，加上網民好pure好true當正佢哋真拍拖！依家余文樂攬住王棠云睇日落話係樂嫂喎，大佬，你當日攬住周冬雨睇日出㗎！成班網民狂鬧余文樂利用周冬雨做擋箭牌兼成日抽水，仲有人發起要抵制佢返內地吸金，擺明應驗「見到你就走」呢個魔咒！

王棠云被人起底狂鬧，更有傳經濟狀況唔多好。

周冬雨

拋肉晒肌轉移視線

壞人衣食猶如殺人父母，雖然邁向皮帶大王女婿之路啫，余文樂當然詐晒型反擊網民話點解說話咁傷人啦！點知愈整愈衰，「連坐法」效應又嚟嘞！王棠云被人狂鬧起埋底不特止，連皮帶大王都遭殃，突然傳出佢經濟環境唔係大家想像得咁美好喎！明明話係「皮帶千金」嘛，但依家分分鐘只係「皮蛋千金」，就等於余文樂當年自爆有日去買三個豬柳蛋漢堡，買完先知入面根本冇豬柳，得番包皮同雞蛋一樣！走又唔係，唔走又唔係，係咪點都要博一鋪呢？余文樂隨即改變策略玩「拋肌忍辱」嚟轉移視線，先刪除詐型留言，再post晒操肌相，話自己用盡洪荒之力先操到呢副偈，擺明賣肉護花，一夫當關啦！我Nuts哥唔係唔信世上冇真愛，始終愛是永「痕」，世界誘惑何其多，既然余文樂都玩到出賣肉體嚟保護王棠云，睇嚟想做皮帶女婿嘅決心都非常堅定！呢鋪過到關，起碼贏晒未來外父嘅印象分先啦！高招！

女尊男卑，雖然都有陳山聰同何超雲失敗例子，但都有好多成功個案，好似黎諾懿、吳家樂同組合Mr.成員Alan咁，外家係有錢，但一樣排除萬難組織幸福家庭！如果有乜冬瓜豆腐，都仲有小儀呢個後着！余文樂曾經同小儀講，話自己如果過幾年都搵唔到對象，就大家一齊喎！