開騷前「拗柴」 朱咪咪自認卜卜脆
歌手朱咪咪將於下月3及4日（大年初七及初八）假紅館舉行《朱咪咪利利是是演唱會2017》，昨日她卻包紮住左腳、一拐一拐踢拖出席綵排，朱咪咪解釋日前在樓梯級「拗柴」：「廚房行出嚟唔小心扭到。」由於當時未有異樣，她翌日更上船登台，可惜表演後左腳即腫痛，她說：「起身同行路都要搵嘢扶住。」
敷藥兼針灸
由於快將開騷，為穩陣計朱咪咪立即向中醫師求診，她說：「去咗針灸，依家證實入面發炎，同埋怕影響盆骨條筋，所以盆骨位置敷咗藥同埋針灸。」搞笑的朱咪咪自爆將針灸時所拍下的相片，傳給身在新加坡的兩個寶貝仔，細仔竟爆粗說「他X的」，朱咪咪說：「大仔就好緊張叫我小心。」
半年打骨針
年屆62歲的朱咪咪否認骨頭脆，笑說：「我仲卜卜脆，就係因為成日講，依家應驗咗啦！」之後她又透露有打骨針：「二千幾蚊一支，半年打一次，打完真係幾好。」記者叮囑他多留家休息，抵死的朱咪咪說：「我一向都唔出街，有自閉症，啲人話宅男宅女，我係宅婦。」至於演唱會可有其他嘉賓？朱咪咪表示有意找馬德鐘助陣。
文：音樂組