天后容祖兒將於3月底假演藝學院舉行10場《容祖兒.My Secret.Live》演唱會，門票未開售已掀起撲飛熱潮，但因場地及場數所限，門票只有一萬多張，據知英皇亦拒絕接受任何內部認購。
祖兒接受電話訪問時表示有聽聞此事，又坦言自己亦不夠門票，要「靠嚇」去阻止朋友及同事大手筆買飛：「有啲朋友一落要五十幾張飛，但冇辦法呀，我都有嚇一嚇大家先，好多歌大家未必識，因為今次係主力唱Side Track，非主打歌，但結果都冇用。」又笑稱要熄電話幾個月去避飛債及準備個唱。而祖兒更再次提醒大家門票於下星期一優先訂購，而本月23日就公開發售，為讓更多歌迷可以買到飛，每人限購4張門票。