唐詩詠做舞女 洪永城拉隊支持
藝人洪永城與唐詩詠是圈中公認甜蜜的一對，對於女友有新電影上映，洪永城力撐戲中飾演舞女的唐詩詠很有品味，有意拉大隊包場睇戲，並承諾一有空便再入場，實行全天候力撐，錫女友錫到出晒面。
藝人洪永城（Tony）、蔡思貝、何雁詩及黃子恆等昨日宣傳無綫新劇《味想天開》，與一眾長者玩遊戲及派禮物，氹得「老友記」非常開心。身為主角的Tony指本周平均收視22點，認為成績可以更好，揚言若該劇收視達30點，會孭肥媽遊街。
拍旅遊節目險被打
問到為何不找女友詩詠撐場？Tony笑說：「佢忙緊拍劇同宣傳新電影。（佢新戲演舞女。）呢個係好有品味嘅職業，佢個人都係，我一定會支持，仲會叫晒朋友去睇，包場又好，總之想發達就去睇。（睇幾多場？）一得閒就去睇，喺網上都會幫佢宣傳。」對於鄭嘉穎拍外景，於未有申請情況下硬闖澳門保安部隊事務局而被當局帶走問話，問Tony有否慰問嘉穎女友陳凱琳？他稱：「應該冇事，演員唔會牽涉入去。」他自爆曾於外地拍無綫旅遊節目，被當地警察拉埋一邊，最終劇組給予數百美元了事，但他不願再透露詳情，只稱若不用錢解決，相信會被打。
蔡思貝摑Tony減壓
思貝於劇中經常與Tony咀嘴，她笑言今次算是拍劇以來最多咀戲，已咀到冇感覺，她又稱不乏摑Tony的戲份，每次都出力摑，可發洩生活壓力。提到何雁詩日前自爆經歷零收入的日子，思貝自言尚算幸運，當選港姐後獲公司給予不同機會，再加上支出不多，故生活不成問題。而何雁詩表示零收入的報道出街後，獲Tony傳短訊支持。問到近日工作可有增加？她說：「暫時又未有，我都想多啲。（有冇多咗朋友打嚟話想幫你？）都未有，本身都多朋友，佢哋都有關心我。」
文：影視組