歐鎧淳逼叮叮Window Shopping慳到盡
有「香港女飛魚」之稱的歐鎧淳，游水了得加上樣子甜美，近來人氣急升，身價數級跳，賺錢賺到手軟，但不改慳家作風，日前與女友人乘電車往天后行商場睇格仔舖，雖然店舖關晒門，但Window Shopping齋睇唔買一樣咁開心。
被宅男捧為「飛魚BB」的歐鎧淳近來頻頻獲邀出席公開活動搵真銀，曝光率大增的她身價數級跳，事業得意之餘愛情又有新氣象，早前撇甩退役水球手男友陳浩軒而戀上新星胡子彤，吸金力大增的她日前出席完活動後不約男友拍拖，反而和女友人行街解悶。
逛街食閉門羹
歐鎧淳以帽及眼鏡極速變身，當晚7時許和女友人結伴現身銅鑼灣電車站，只見她和一般港女無異，頻頻低頭撳手機，及至電車駛至，即和女友人匆匆上車，和其他乘客排排坐逼沙甸魚。歐鎧淳和友人到天后即下車，步行至附近的商場仔，雖然當時大部分店舖已關門，但近來忙於搵錢忙到冇時間Shopping的「飛魚BB」一樣唔放過，逐間店舖慢慢睇。
彎腰慢慢睇
歐鎧淳睇得投入，期間彎晒身Window Shopping，睇完格仔舖又睇電子小產品，齋睇唔買一樣咁開心，未幾終於發覺有間電話配件小店仍在營業，只見她興奮入內慢慢揀，可惜最終都揀唔啱心水，空手而回，又成功慳番筆。
文、攝：追蹤組