香港都有個Johnny嗒 鄧兆尊馴服三隻小姝

老竇係明星，鄧兆尊當然天生一副明星相，佢都話自己靚仔！當年佢喺周星馳電影《國產凌凌漆》做死囚，臨死前喊到口水鼻涕出晒嚟都要狂呼一句：「我咁靚仔，我唔想死呀！」將後現代嘅絕望同痛苦充分刻劃，嗰副「死樣」認真經典！

帥哥排名勁過嘉穎

嗱！我Nuts哥都知靚仔呢家嘢係好主觀，但有網絡百科全書喺鄧兆尊嘅「主要成就」一欄寫住呢廿隻字：「2013年古龍電視劇百位帥哥排行第87位」，話佢23年前喺《小李飛刀》飾演「龍天賜」而被叫帥哥喎！大佬！鄭嘉穎同台灣鵰神何潤東都係排91同95咋！係咪勁先？唔好問我點排行，總之人民就算忘記，歷史不會忘記啦！

其實「3C」喺鄧兆尊眼中，百分百係三隻可愛嘅小「姝」！嗱！唔好有邊讀邊，「姝」音讀豬或輸，係解作「美好女子」。「三隻小姝」有乜咁美好，我Nuts哥真係唔知，真係鹹魚青菜各有所愛，林子祥都唱「鹹魚白菜也好好味」啦！我只知鄧兆尊寵愛「三隻小姝」嘅程度，係Very Good、卜卜脆，任何場合都要佢！「三隻小姝」識揼骨又做過助手等百般武藝，同鄧兆尊衣食住行無限Fun！唔使搭枱坐埋一枱鋸番個豬扒套餐；興起開枱麻雀或鋤Dee又得；就算搭的士四個人一架車啱啱好，分分鐘連賓賓都慳埋，你洗衫我掃地佢煮飯！淨係講台型都夠照，一行出嚟大爺咁款，「三隻小姝」品字型咁圍住，唔當保鏢都夠擋風啦！大姝小姝小小姝全部被分派住喺灣仔唔同單位，即係去行宮永祥大廈，「點燈」都慳腳力，總有一個喺左近！

經典五招冧姝姝

一個男人可以Handle三件，你估真係因為鄧兆尊有過億身家就搞得掂？大把有錢佬身邊都有唔少紅顏知己，最終搞到反晒面揭晒家醜！有邊個好似鄧兆尊咁，和平共處四人行？早排仲傳鄧兆尊有四奶，佢話：「三個已經夠煩，依家只得三個女友咋！」嗱！個Point係「只得」呢兩個字，即係話世事無絕對，只有真情趣，遲啲有埋「兆尊七友」都唔出奇，打番場七人欖球友誼波都仲得！

成功一拖三可能係銀河唯一的秘密，其實溝女係唔使用劍嘅！鄧兆尊真人示範《水滸傳》其中一回「潘驢鄧小閒」經典冧女五絕：「潘」即係似俏潘安咁靚仔，鄧兆尊係咪靚仔，頭先講咗唔想再重溫；「驢」者指精壯如驢，鄧兆尊係咪精壯，觀乎佢有心有力應付「三隻小姝」之餘，得閒拎住支私家Q有腰力篤番場波，就嚟男人50算係咁啦！「鄧」者係指富翁鄧通咁有錢，唔係話你姓鄧就得，鄧兆尊有個富爸爸，明晒！「小」者細心脾氣好，「閒」者閒情逸致，鄧兆尊咁多時間陪買衫行街，幫手埋單又拎埋手袋，仲唔Bingo！

前車可鑑，經歷過爭產事件，鄧兆尊就識玩喇，萬事以和為貴！話明唔結婚唔生仔，個個都係女友，免爭產事件重演，最多同「三隻小姝」得閒喺屋企耍花槍玩吓爭橙咪算囉！

Nuts哥