跌谷底曾萌退意苟芸慧女神歸位

2013年，苟芸慧（苟姑娘）發現體重不尋常地上升，經過診斷證實患上甲狀腺病，她憶述：「嗰陣唔知點解體重不斷升，初時以為係自己唔夠Fit，後來唔食嘢淨係做運動都依然肥，就知道出咗問題。甲狀腺病成因係壓力，嗰時睇嘢好灰，成個人冇晒方向。（壓力因為工作？同郭富城傳緋聞？）每樣都有，好多嘢諗唔明，覺得自己冇做錯，點解係咁畀人話？（有冇諗過輕生？）咁又冇，我驚痛，但有諗過想退出娛樂圈返加拿大，因為加拿大係我屋企，覺得返去就會舒服，但因為當時未完約，所以走唔到，亦唔想逃避。」別人不理解，拿胖了的她開玩笑，工作不順、緋聞，壓力可想而知。

澄清冇脹到170磅

經過兩年多的治療終於康復，現時她更注重心靈健康，但她特別想澄清一點：「我嗰陣真係冇170磅咁重！其實依家我都冇特別磅，但我買衫就知道自己瘦咗，買細兩個碼。」去年11月跟TVB完成七年約，她表示很享受現在自由的感覺，暫無意簽新公司，反而想去進修讀書，如珠寶設計及藝術等，做些自己有興趣的事，亦希望能藉着自己的經歷去幫助別人。

「我係唔會做第三者」

苟姑娘為人所熟悉的，還有她跟岑麗香、鍾嘉欣及王君馨等組成的「處女黨」，近年成員陸續結婚生子，她笑說：「依家得番我一個，我係會長，不過可以再招攬會員，例如嘉欣個BB女！（你心唔心急？）真正嘅愛情係值得等待！」跟「錫礦大王」後人陸漢洋的緋聞愈來愈浮面，她甜笑說：「佢喺賽車方面教咗我好多嘢，依家大家關係好好、好舒服！」曾被指介入天王郭富城與熊黛林的戀情，與陸漢洋開始時同樣被指是第三者？她無奈地說：「唔知點解我好容易惹到呢啲緋聞，但我係唔會做第三者，我自己都係女仔，明白感受！」

苟姑娘又指自己十分Old School，認為女孩子應該要有矜持，她續說：「我冇試過同人同居，或者依家嘅人諗法唔同，但我比較傳統保守，覺得應該要Keep住矜持，所以我係處女黨成員，但喺愛情裏面，唔需要標榜住呢樣嘢！」

Jewelry：ASHOKA BY MADIA

Shoes：Andrew Kayla

Make-up：亨利

Hair：Sue Cheung @ Hair Corner K11

Venue：Shelter Italian Bar & Restaurant

文：Ada Lam

攝：張福宏