月前因紅斑狼瘡症及抑鬱症而入戒療所3個月的24歲人氣歌手Selena Gomez，近期逐漸復工，原來情路都有着落。近日她當街攬啜模特兒好友Bella Hadid的舊愛The Weeknd，新戀情曝光後，即被Bella取消關注社交網，攬仔失老友！
與加拿大小天王Justin Bieber長期掟煲唔掟蓋的Selena終於有新戀情，大前晚被拍到與24歲歌手The Weeknd於美國洛杉磯聖莫尼卡一間餐廳門外又攬又啜！二人當晚離開餐廳後完全零避忌，Selena全程身貼身攬實男友，眼見記者在場，唔避忌直望鏡頭冧笑，情到濃時忍唔住咀The Weeknd面珠，更連環嘟嘴索吻，非常「進擊」，行幾步路都攬到實一實，大方以行動公布戀情。
據悉Selena與The Weeknd當晚於餐廳撐枱腳足足3粒鐘，有專屬侍應服侍。有知情人士爆料：「佢哋本身打算地下情，不過之後決定唔再理大家知道佢哋撻着。The Weeknd其實一直對Selena都有啲嘢，覺得對方好有才華同Sexy。依家一齊咗，暫時仲未發展到好認真階段。」二人前年於Victoria's Secret（VS）內衣騷同台演出，齊以全黑色造型上陣，相當有默契。
其實The Weeknd去年11月才跟Selena的20歲好姊妹索模Bella Hadid結束年多戀情，二人甩拖後於去年底的VS騷「狹路相逢」，Bella唧都唔笑，騷前更被拍到望實與The Weeknd咀嘴的舊相，似難忘舊情。日前Bella發現好友撻着舊愛，即時「Unfollow」Selena的Instagram帳戶，相信難再做好姊妹。而Selena前日被攝影師在社交網上載裸背照，更露出「八月十五」，未知The Weeknd會否呷醋？
此外，荷里活影星華堅馮力士（Joaquin Phoenix）近日亦傳撻着新作《Mary Magdalene》拍檔朗妮瑪娜（Rooney Mara），發言人即時澄清，指二人多次合作電影，是多年好友。
文：外娛組