B女郁手郁腳吳若希呻冇覺好瞓

歌手吳若希（Jinny）宣布有喜後便停工專心養胎，但未有因而忘記Fans，不時在社交網分享生活點滴。現已懷孕5個多月的她，前日便分享了一條晒肚短片，片中看見她的肚皮突然跳動，相信是腹中B女踢了她一腳！她寫道：「呢個友仔尋晚開始係咁郁手郁腳無停過，搞到佢阿媽瞓得勁差，今朝一早起身陪佢戇居居攤喺床成日！」更Hashtag「bb保你大」、「虛脫」、「做人阿媽甚艱難」等，非常搞笑！網友紛紛留言打氣，又叫Jinny忍耐，並教她開始胎教，令B女有意識要入睡。