蕊蕊埃及探古墓露營後浸「黃沙浴」

歌手蕊蕊早前與朋友遠赴埃及旅行十多日,在朋友幫助下深入不對外開放的古墓!蕊蕊又與朋友齊齊在沙漠露營,由於翌日才可返回酒店沖涼,她笑言露營後滿身沙粒,洗到浴缸水變成黃色!

蕊蕊日前與朋友到埃及旅行,由於有朋友自辦旅行團,她終可一償心願到夢想之地旅行。埃及有多個古墓,此行有機會深入古墓大開眼界的蕊蕊說:「其實都去咗好多地方,其中我哋去咗個墓入面,但個墓係唔公開,咁啱我哋識人特登帶我哋去,但就唔可以影相,所以幾深刻!(驚唔驚?)咁又唔係好驚,感覺都幾莊嚴,覺得一生人真係要去一次呢個地方!」

捱冷瞓沙漠

繼深入古墓後,蕊蕊又與朋友在當地沙漠露營,她自爆翌日回酒店沖涼,滿缸水都變成黃色:「有晚去咗沙漠露營,其實都真係幾凍o架,仲要成晚都冇得沖涼,成身都係沙,頭髮又係沙,第二日先可以返酒店沖涼,沖出嚟啲水都係黃色!(有冇沖多次涼?)咁又冇,雖然嗰下真係幾震撼,但真係一個幾好嘅體驗。」

文:專案組