龐卓欣情傷足本 舊愛拖女親熱真人騷
現為火紅YouTuber的前港姐亞軍龐卓欣，自小在任職音樂老師的媽媽薰陶下，對音樂產生濃厚興趣，她早前回到充滿難忘回憶的香港兒童合唱團（香兒）何文田分部校舍，化身導遊帶領大家參觀她的第二個家，細說難忘往事之外，更即席彈奏一曲。
龐卓欣（Ada）因媽媽以往都在香兒唱歌，故她4歲時已加入這個大家庭，以往曾跟香兒到維也納和匈牙利表演及比賽：「其實我喺呢度唱咗好多年，4歲唱到我中三離開香港嘅時候，所以都代表過香港兒童合唱團好多年，喺呢度學唱歌嘅好處就係會一班人去外國表演比賽。」
行到掛滿相片的走廊時，Ada搞笑地不認得小時候的媽媽：「我知道媽咪喺呢幅相入面，佢之前指過畀我睇，應該係唱高音呢度其中一個，而嗰邊就係我自己嘅（相片），係喺匈牙利，呢個係我嚟㗎，似唔似樣呢？如果你哋有睇過我喺YouTube channel講初戀嘅話，我已經問過佢（初戀），佢話唔介意畀人知道佢係邊個，我可以指埋佢係邊個，就係呢個，佢叫Henry。」
日日練唱10粒鐘
走進班房的Ada，憶述以往每逢星期五都會練歌三小時，暑假時期會進行地獄式訓練：「年年暑假都會去海外比賽或表演，日日都會喺度練8至10個鐘，所以呢間房基本上係我好多嘅回憶，其實喺呢度學唱歌，培養咗我好多嘅音樂興趣，所以依家唱歌、唱古典音樂都係香港兒童合唱團培養我。」她又自爆正是在這個班房邂逅初戀男友，並重提遭拋棄的來龍去脈：「佢識咗第二個女仔，個女仔都係香兒，我嗰陣咁唔開心，係因為我哋一齊去外國，咁我就真係日日望住佢哋拖手、錫、喺面前勁親熱，我好唔開心，日日喺酒店喊，嗰陣啲朋友就晚晚嚟我間房氹我、開解我，呢個就係我最心酸嘅事，嗰陣因為呢樣嘢而有厭食症啦！」
至於何不選擇退出香兒？Ada解釋：「嗰時好多人都問我，會唔會諗住退出，我又覺得唔會喎！亦都好彩我冇咁嘅諗法，雖然嗰陣真係好辛苦，晚晚都會喊，但好難得識到香兒呢班朋友，尤其是大家都咁鍾意唱歌，好難搵到大家咁熱愛做同一樣嘢，所以我依家就有一班好好嘅朋友。」
百厭蠱惑招 考試「咪嘴」
Ada轉眼間已離開合唱團多年，她感恩跟這裏認識的知心好友仍有聯絡，友情亦沒有隨時間消逝：「啱啱上個禮拜去咗香兒校友聖誕派對，好開心，有啲朋友唔使成日見、唔使成日傾偈，一見到就會好似返到以前咁，好好傾，唔會覺得好生外嘅感覺，好sweet，因為始終人愈大愈難識到知心朋友，尤其是我哋以前一齊去過外國表演、比賽，又一齊住過，經歷過好多好難忘嘅事。」
唱勻德法意文
她透露當年於香兒的訓練辛酸史：「老師好嚴，我哋又跳舞又唱歌，背歌要背德文、法文、意大利文，要背兩、三個鐘歌，背得好辛苦，因為如果考試背唔晒嘅話，基本上係唔使去（外國）㗎喇，所以嗰陣喺學校都偷偷地背歌詞，大家又會諗騎呢方法幫大家背，好開心最後個個都去到，冇試過去唔到，團結就是力量。」
獨自一人在班房時，Ada更公開其百厭背歌秘訣：「等我話啲秘密畀你聽，我嗰時係唱高音嘅，考試會抽人企喺度背歌，但我冇背熟，不過我扮嘢係最叻嘅，望住人哋啲口型扮口型，扮到好有自信咁，但之後都係畀老師話：『Ada你好似未練好？』我就話唔係，我識㗎，第一次唔係好識，第二次記得少少就pass咗，背嘢嘅秘訣就係扮到好有自信，咁就可能會過到關！我幾次都係咁樣，呢個就係我Ada讀書秘訣。」
童年拾趣愛民邨 飲涼茶篤糯米糍
自小在香兒何文田分校唱歌的Ada，自言可算是「半個愛民邨人」，邨中各處地方均充滿其童年回憶，她表示每次練歌前都會到涼茶舖飲銀菊露潤喉，放小息時又會到麵包店買糯米糍「醫肚」：「呢間店嘅糯米糍真係好好食，伯爵茶糯米糍係我最鍾意嘅味道。」她又自爆在遇到初戀男友前，曾於巴士站萌生跟蹤喜歡的男孩乘車回家的想法，現在回想起來，亦覺得當時十分純真。
後記：喊到癲！見證最強友情
一嘗坐指揮櫈的Ada笑稱：「終於到了Miss Pong專業指揮家時間！」她分享當年16歲離開香兒到美國讀書的感覺：「喺呢度最後一堂係勁唔捨得，因為始終喺呢度十幾年，而呢度有個傳統係最後一堂個個都會唱一首歌say goodbye嘅，真係會喊苦喊忽，喊到癲咗，同埋佢哋真係好好朋友，我走嘅時候都有送機，喺我入閘之前都再唱嗰首歌，所以真係見證我哋友誼好強，好單純大家錫大家嘅朋友，又會嚟美國探我，喺我度住，一直都有聯絡。」
文：車車
攝：吳文聰、黎志輝