傳向定欣求婚？展鵬：生埋仔添啦！
視帝陳展鵬於大除夕當日朝早飛到檳城出席新年倒數活動，一落機他先專誠抽空到當地的孤兒院探訪，相當有善心。第一次來到檳城倒數的展鵬，坦言之前於馬來西亞勇奪視帝，此行順便謝票，現場有近萬名fans，相當有氣氛。展鵬謂：「其實我都未試過同成萬粉絲一齊倒數，之前嚟過檳城拍劇集《單戀雙城》，呢度啲觀眾都好支持我。對呢個地方都特別有感情，之後農曆新年有一日假期，都會再嚟檳城做登台活動，亦會到內地登台。」
榮升視帝怕冇job
此外，1月14日是展鵬的生日，檳城的粉絲專登送上榴槤蛋糕替他預早慶生。昨日展鵬亦出席活動，透露每年生日都會與粉絲慶祝，今年更要搞得好好睇睇。問到會否相約胡定欣食生日飯？他謂：「唔會啦！（傳你向定欣求婚？）生埋仔添啦，呢啲得啖笑！（媽咪有冇催婚？）有，但要我鍾意先得㗎！（有冇問你同定欣啲緋聞？）冇啦！」問到勇奪視帝的他，酬勞有否三級跳？展鵬謂：「最驚就係呢樣，好多人話攞咗獎冇工作，影帝會冇戲拍，我想叫公司幫我接多啲。」
文：影視組
