孖日模女友開工 黃宗澤快閃拍拖

型男黃宗澤（Bosco）與日模女友Jun因拍攝健康食品廣告而撻着，近一年的戀情依然Keep得住，月前更再度合體拍攝新一輯廣告。由於他們都非常忙碌，今次趁工作在港短聚3天，寓工作於拍拖，總算一解相思之苦！

問到留港期間可有慶祝聖誕及新年？Bosco呻：「冇啦！拍完第二朝就走喇！我去橫店拍劇，佢都好忙。（咁少見點維繫感情？）冇辦法啦！我拍劇已經排到11月，遲啲要返嚟開《溏心風暴3》。」至於在日本發展的Jun則在Instagram上載到廟宇求籤的照片，籤文內容指：「如果你對神明忠誠，就會得到神明照料與庇佑，心誠即靈，萬事會如煦日初升般順利，心情暢快。」

嚴格控制飲食

雖然只能與女友短聚3天，但見Bosco神采飛揚，原來他為廣告操Fit，更谷爆胸肌！他坦言要長期Keep住40吋胸絕不容易，除做運動外，飲食方面亦要下苦功：「只食白肉，唔食油，夜晚唔食澱粉質。（驚唔驚患厭食症？）唔會，只係唔食肥膩，我唔會畀自己重過150磅！其實身邊朋友見到我都覺得我好瘦，都好擔心，依家見到我個Body應該放心啦！」

文：影視組

_