細細粒組少女黨 心急嫁人
由無綫花旦鍾嘉欣和岑麗香等組成的「處女黨」成員各自覓得好歸宿自動解散，近日因拍劇成為閨蜜的陳嘉佳（細細粒）、林欣彤（Mag）、鄭欣宜（Joyce）及吳沚默隨即接棒，宣布組成「少女黨」，計劃四出「獵艷」，務求早日脫離單身行列，細細粒更稱歡迎「有需要人士」申請入黨！
細細粒、Mag、Joyce及蔡瀚億等昨午拍攝新劇《老表，畢業喇！》，由於天氣突然變冷，Mag充當外賣妹，負責買熱飲給大家保暖，Joyce亦買了大堆零食宴客。談到近日開工時間頗長，細細粒笑說：「拍到化妝甩晒、攰到擘唔開眼嘅時候，就會諗不如快啲嫁出去唔使做！好羨慕『處女黨』個個嫁得咁好，我同Mag、Joyce同吳沚默就組成『少女黨』，暫時得4人，遲啲可能會改番個再好聽啲嘅名，歡迎其他有需要人士報名加入。（真係好急搵番個？）梗係！」
約埋去旅行
Mag直言拍攝初期擔心與其他拍檔不熟，想不到大家笑點一樣低，很快已成為閨蜜，日前台前幕後還互相交換聖誕禮物。她們更打算二月初劇集煞科後，相約去旅行充電，可惜因為拍攝期延長，最終未能成行。細細粒稱：「聽到消息個心仲凍過今日嘅天氣，可能都好嘅，我哋押後到二月尾先出發，唔使捱貴機票。」
欣宜生眼瘡
欣宜昨日眼矇矇開工，她解釋：「日前開工後隻眼突然腫咗，去睇醫生知道因為缺乏休息所以生瘡，即刻消炎滴藥水，依家終於消腫，不過暫時唔敢戴隱形眼鏡。今次我扮演郭晉安嘅表姑姐，喺加拿大返嚟但好鍾意蠱惑仔文化，我覺得好特別同有挑戰性囉。」
文：影視組