Gin Lee自責有錯 AGA分手要狠

性格極端凹凸配

Gin Lee與AGA推出的合唱歌《一加一》及《獨一無二》成本年度大熱歌曲，兩女由同事變成無所不談的閨蜜，工作上兩人非常合拍，但愛情觀與性格卻非常極端。Gin Lee自認性格內向慢熱，而熱愛跑步的AGA則非常好動。AGA說：「我覺得自己比較慢熱，唔係一嚟就好快好熟，佢（Gin Lee）熱情啲。」Gin Lee大讚對方冷靜：「我同AGA都有好多相似地方，性格上最唔同就係AGA個樣永遠都好冷靜、好美好，但佢有一夥非常澎湃嘅心，呢個係我識佢之後先知道，但佢亦係好奔放嘅女仔，好鍾意出去玩，好鍾意做運動又跑馬拉松。佢外表好似乜都好驚，但又鍾意睇恐怖片，完全同佢外表好唔似。大家會覺得我好鍾意去party、好貪玩，但我係宅到爆唔出街。」

AGA笑Gin Lee外表似喜愛夜蒲，但其實宅到爆。	Gin Lee是短跑好手，近年亦愛上瑜伽。	放大圖片

一個心軟 一個冷靜

兩女承認性格差異，就連處理男友偷食都持不同見解。問到若發現男友與小三偷會，可會當面對質？抵死的Gin Lee問AGA：「你會唔會衝過去鬧佢？」AGA堅決地表示不會：「我諗我唔會同佢講嘢，應該會自動消失，即刻分手。我比較心軟，怕佢一解釋就好易擾亂判斷。」Gin Lee則指一段感情出現第三者必有原因，不能只怪另一半，她說：「我都唔會即時畀反應，會自己消化，我好冷靜，會諗應該點處理呢件事先，跟住返到屋企先同佢傾，如果發現佢真係鍾意第二個，就會問佢想點。」問到是否冇彎轉？Gin Lee說：「睇情況，以前細個聽好多出軌故事，覺得自己一定冇偈傾，但大個之後發現呢啲情況出現，未必淨係佢嘅錯，一段關係入面點解佢咁做呢？可能我都有錯，可能我做一啲嘢令佢去做呢樣嘢，依家就覺得傾咗先，然後睇吓點樣處理件事，修補到盡量去做，唔得就要好果斷離開。」

AGA笑言爆發力不及Gin Lee，但耐力一定勝過對方。

AGA曾與徐濠縈（中）、張惠雅到日本接受馬拉松訓練。

創作分歧 唔啱傾到啱

由於兩人於音樂家庭長大，Gin Lee父親是樂隊鼓手，母親是女歌手，而AGA父親亦是樂隊樂手，母親則精通鋼琴。兩女承認自小與音符融為一體，不過聽歌品味卻有差別。兩女自爆合唱《獨一無二》的趣事，Gin Lee說：「佢寫嘅時候啱獨唱唔適合合唱，我就覺得不如加啲元素、起伏同交流嘅位令首歌多番啲層次同激情，因為我哋係隔空去寫，比起一齊寫難好多，加上又唔想改動佢嘅嘢太多，最終用咗一個禮拜先寫得到。」

約埋跑步？難啲喎！

兩人除擁有音樂細胞，運動天分亦非常勁。Gin Lee求學時是一名短跑好手，曾以做國家運動員為目標，AGA則是入行後才愛上跑步，更試過飛到外地參加馬拉松比賽。問到會否相約跑步？AGA坦言：「呢個有矛盾，因為佢跑短跑又鍾意做瑜伽，我反而鍾意做好快嘅運動。」Gin Lee則指AGA可以跑足一晚：「佢鍾意跑成晚，我唔得，跑半個鐘就唔掂，我係爆發力，所以好難約埋跑步。」AGA搞笑地說：「唯一目標最明確就係食嘢。」

Gin Lee

髮型：Eve Chiu@Queen's Private i salon

化妝：Circle Cheung（ndnco.co）

AGA

髮廊：Gary Sun@Hair Corner

化妝：Elaw Wong assisted by Crystal H@thelook-studio.com

服裝：izzue

場地：My Sewwt Art

文：音樂組　

攝：劉智源