趁麥明詩冇影 Carman攝位冧林作

林作（Joe）前晚在其幾千呎寓所舉行27歲生日派對，除林媽媽外，更請了不少律師朋友及圈中好友到場，包括港姐冠軍馮盈盈及男友、女子組合Bingo隊長Carman（關嘉敏）、成員Christy及Odilia等，有傳其舊愛麥明詩亦會到場，但最終都沒有出現，反而與Joe在澳門拍微電影而傳緋聞的Carman拉大隊到賀，更送上鱷魚及老虎狗夾手指玩具作生日禮物，難道想「食」住Joe？Joe在派對上大讚Carman靚女，好似翻版周秀娜，又安排「見家長」，介紹她給媽咪認識。據知不少好友送上靚酒，飲大兩杯的Joe一時感觸，拎起咪感謝媽咪27年前生了自己。

讚林媽媽高貴

壽星仔昨日接受本報訪問，問到Carmen很冧他時直言很欣賞對方：「佢係幾好，但唔會對我有興趣，佢條件太好。（追佢？）我係欣賞佢，佢好有內涵。」而自稱單身的Carman，大讚初次見面的林媽媽高貴又幽默：「Auntie讚我靚女，林媽媽同林作一樣風趣。（見埋家長，唔擔心緋聞？）放心啦！唔會，咁多人一齊見家長咩！況且我同林作只係朋友，佢未到男友嘅地步。我同隊友都有隊佢飲酒，佢飲到腳步浮浮，但我問佢麥明詩時，佢就唔答我。」

明冧林作的Carman（左一）拉隊現身生日會，又黐到實影相。	馮盈盈帶同男友賀壽星仔。	林作特地安排媽咪與Carman認識，趁機「見家長」。

鍾意幽默男仔

問到是否因林作有麥明詩，以致關係不能再進一步？她直認：「其一啦！同埋我鍾意C君（農夫成員）嗰種類型，唔使靚仔，唔需要有家底，高度都冇要求，如果對方可以幽默到成日令我笑到標眼水，我會加分！（C君追求你會接受？）唔會啦！男神嚟o架嘛！」雖然口口聲聲「戀人未滿」，但她明顯非常關心林作：「我同林作媽咪都以為好多朋友會帶蛋糕嚟，點知個個都係咁諗，所以冇人買蛋糕，生日冇蛋糕食好慘！」至於麥明詩坦言冇去派對亦冇買禮物，但已傳短訊祝福。

文：名人組