Super Girls核突頸巾送男友
女子組合Super Girls（SG）憑健康形象俘虜萬千宅男心，但她們單身多年，令到聖誕節都要以工作麻醉自己！隊長Aka說：「最驚過聖誕，永遠喺街見到人一對對攞住花同禮物，我就攞住贊助禮物，又冇人幫我拎。」成員Jessica承認聖誕最想攬住及拖住愛人，Aka插嘴說：「最好聖誕排滿工作，畀人問聖誕有咩嘢做，就大條道理話我好多嘢做。」Heidi和應說：「我都希望好多嘢做排到滿晒，乘機去搵錢。」有否想過要過白色浪漫聖誕？SG齊心說：「梗係想啦。」擺明恨拍拖！
SG又承認曾為男友織頸巾，惜「爛尾收場」，Aka說：「冇乜耐性，好快收針搞到條頸巾好短。」Heidi自爆要搵阿媽出手：「開頭同結尾要媽咪偷偷哋幫手，仲試過有年未送已經分手。」Jessica透露有次回港買冷球，因估計錯誤搞到要在美國補貨：「點知唔啱色，搞到頸巾兩截色。（男友有冇戴？）有呀，呢啲真愛嚟。」Yanny則說：「織過一條好核突，漏晒窿，阿媽睇唔過眼幫我織咗幾行，睇到條頸巾一截好、一截唔好，但都有送畀男友，佢仲讚靚添。」
攝：劉斌
場地：apm
文：音樂組