張頴康氹呂慧儀Share餵母乳心得
呂慧儀與張頴康為人父母，面對無綫明年推出大台網App，開放藝人與網友互動，二人同聲表示有興趣透過平台分享最拿手的親子題材，抵死的頴康建議慧儀向網友分享餵母乳心得，慧儀卻擔心引來反效果，被網友送來奶樽，笑指現時已有足夠囝囝的生活點滴供應，準備屆時作大晒冷，而頴康亦正密密儲囡囡片，惟愛女望見鏡頭瞄準她便Say No！
無綫日前宣布將於明年4月推出跨地域、跨媒介的嶄新媒體─「BigBigChannel」大台網App！集合全台上下藝員、歌手及網羅全球「網紅」打造藝人直播室、美妝、旅遊、美食、親子及藝人陪打機等的精彩平台，當中網民瀏覽量將兌換成Show錢計算，為藝人帶來另類收入進帳，不少藝人聞得公司有新搞作即蠢蠢欲動，已為人父母的呂慧儀與張頴康，更第一時間表態，同聲表示有意參與親子欄目。
搵埋老公幫手拍片
慧儀育有一名兩歲囝囝，大抵受先天因素影響，出世至今對鏡頭觸覺相當敏銳，往往瞄到鏡頭位置便會一支箭衝上前，人仔細細更懂得插褲袋擺甫士，問到她想與網民分享甚麼親子樂？她說：「我拍落好多片，平時鍾意同個仔去郊外捉昆蟲，連佢學游水都拍好多，我仲會剪埋片，總之精華片段一定有，個平台除咗放片仲可以互動，我諗住同個仔讀故事書、畫畫呢啲時間都可以同大家交流吓心得，我會叫老公拍片，但又驚佢淨係Focus個仔度，到時淨係拍到我個膊頭或者得把聲就灰！」與她老友鬼鬼的頴康提議慧儀應分享餵哺母乳心得，慧儀聞言笑到收唔到聲，並說：「呢啲經驗唔可以分享，太私人啦！我驚到時好多網友送個吉奶樽畀我，咁就真係唔知點算！」
訓練囡囡熟習鏡頭
而頴康育有一名兩歲半囡囡，透露其社交平台大多放囡囡或太太的照片，反而自己工作時不會電話跟身，故從來不會有工作照片分享，他說：「我個女鍾意溜冰，等佢足三歲就畀佢學，自從有套動畫係講冰雪，佢成日喺屋企都要跣住唱，當自己喺冰上面，但就走晒音，不過就要訓練吓佢熟習鏡頭先，因為平時我捕捉到佢得意一面，想用手機影佢時，佢就會遮我鏡頭Say No，玩親視像永遠整熄佢，好順手，所以要搞搞佢先。」
呂慧儀服裝：mi-tu
文：影視組
攝：張福宏