鄧佩儀聖誕招兵陪睇燈飾
最近憑無綫劇《幕後玩家》升呢的前華姐冠軍鄧佩儀（Gloria）於加拿大長大，特別喜歡聖誕節，每年都跟家人及朋友食火雞，今年她搞搞新意思，轉食日本和牛，自認饞嘴的Gloria面對超多肉汁的頂級飛驒牛即食指大動，燒完一塊又一塊，食到舔舔脷！
Dry爆歡迎偶遇
24歲的Gloria只拍過一次拖，更碰巧未到聖誕就分手，因此從未過到一個有男友的浪漫節日。她直認Dry爆，每年都會跟好友呻恨拍拖，更笑言歡迎男士追求：「唉！24年都係單身過節，我覺得聖誕係好浪漫嘅節日，同家人過係開心，但都想有男友，每年都會同單身女性朋友睇燈飾……可能今年有偶遇呢！歡迎大家嚟啲有燈飾嘅地方搵我，唔好怕醜，埋嚟同我傾吓偈啦！（覺得咩叫浪漫？）最理想係好似劇集咁，滿天燈飾，兩個人圍住同一條頸巾！（你係個浪漫女仔？）係o架！鍾意人哋親手整嘢畀我，作首歌畀我就最冧！」
唔靚仔都OK
Gloria大談擇偶條件，表示最緊要幽默，外形反而冇所謂：「試過我暗戀個男仔好幽默，但唔靚仔仲矮過我，我覺得幽默唔係爛Gag，係黃子華嗰隻，天生風趣！」Gloria在《幕》劇表現備受讚賞，她希望來年有更多拍劇及拍旅遊節目機會，講到若工作太忙會沒有時間識男友，她就表示工作行先，繼續Dry都冇辦法。
場地：和牛燒肉．純
鳴謝：Barry＠Oneness
文：立影
攝：司徒國榮