張曦雯電暈海龜做免費導「游」

前華姐冠軍張曦雯（Kelly）早前遠赴島國馬爾代夫，拍攝無綫J2台旅遊節目《3日2夜》，兩集內容分別會在平安夜和除夕夜播出。一向不吝嗇晒身材的她，今次當然會穿泳衣上陣晒索爆身形，保證宅男粉絲睇到流鼻血。

大展廚藝

不過Kelly希望大家不要將焦點放在她的身材上，要留意她其實同樣「入得廚房」：「導演知我鍾意煮嘢食，所以都安排咗我下廚教吓觀眾。除咗釣完啲魚就即刻燒外，我仲學咗整個傳統魚湯，當地人係用呢個湯撈飯食。」

海龜眼甘甘望實張曦雯。	張曦雯身形fit爆，從不吝嗇大晒美好身段。	張曦雯唔止樣靚身材正，廚藝亦相當了得，邊個娶到佢真係有福。

問到拍攝過程有何難忘事？首次去馬爾代夫的Kelly表示終於明白為何當地被稱為潛水勝地。她憶述拍攝時戴氧氣樽潛水的興奮事：「好似入咗另一個世界咁，仲有好多海龜游嚟游去，佢哋完全唔驚人，仲好friendly！其中一隻仲喺我隔籬成4分鐘都唔郁，眼定定咁望住我，好似好好奇我點解喺度咁。好想去考個潛水牌，第日可以潛深啲。」

啱度蜜月

漸漸與Kelly打成一片的海龜亦相當識做，充當海中導遊帶住她四圍游，甚有「好客之道」。問她之後會否與男友到馬爾代夫度假？她笑說：「嗰度度蜜月啱好多。（就嫁？）冇咁快。」

文：影視組