ReVe腳傷頂硬上狂舞15粒鐘

由劉瑞祈（Kay）及陳子華（Cavan）組成的男子組合ReVe最近推出新歌《派錯派對》，與一班dancers特別到西環碼頭取景，由早上9點拍到晚上接近12點才收工，現場還準備了一架古董車進行拍攝。

手術過後　休養半年

ReVe與5位dancers齊齊坐上古董車上跳舞兼擺pose，之後就由成員Kay向着碼頭的盡頭慢慢駕駛，但他似乎不太熟手，不能將車直線駕駛，在場的工作人員不斷叫他扭軚，場面搞笑！到晚上，ReVe跟10名dancers在貨櫃上拍攝勁歌熱舞的場面，兩位成員更爬上泥頭車跳舞跳足15小時，Kay更笑言：「又有泥頭車同貨櫃，我哋好似變咗transformer（變形金剛）咁！」

Cavan被爆識講嘢氹女仔。	Kay表示新年過後要做手術。	ReVe與一班舞蹈員爬上泥頭車勁歌熱舞，跳足15小時。

提到新歌同樣是快歌，但Kay早前上無綫節目《勁歌金曲》錄影時，因跳舞用力過度令十字韌帶斷裂，今次都頂硬上跳舞拍MV，他直言其實MV應該在個多月前拍攝，但公司讓自己休養了一段時間才開工：「都要盡快完成呢個MV，除咗休息就要做物理治療去強化膝頭。（要做手術？）新年過後就做手術，之後要休養半年左右，希望練好啲體能，康復得快啲。」

眾人坐上古董車狂歡，甚有開Party感覺。

Kay縱使有腳傷，仍頂硬上跳舞。

口甜舌滑　冧女最得

談到今次有大班dancers坐鎮，ReVe笑指明年會推出兩首慢歌，希望屆時可以跟女dancers合作。Cavan表示兩人有很多拍攝MV的構思，更想上演兩兄弟爭女的情節。問到可有甚麼追女秘笈？Cavan大讚Kay是暖男，Kay則大爆Cavan口甜舌滑好識氹女仔：「佢講嘢真係好叻，令到啲女仔好開心。」對於樂壇頒獎禮，兩人直言能夠參與已覺榮幸，最希望能夠跟草蜢、軟硬等本地前輩級組合一樣，唱足幾十年！

文：音樂組

攝：張福宏