陳奕迅短褲仔「打邊爐」扮驚狂奔

陳奕迅相約郭偉亮、葉佩雯兩公婆睇戲，貫徹「吹神」本色傾唔停。

歌手陳奕迅（Eason）與郭偉亮及葉佩雯老友鬼鬼，日前晚上他撇下太太徐濠縈，相約二人往銅鑼灣睇戲。當晚大約12時，Eason獨自驅車到場，見他在車內不停甜甜笑講電話，看來是向老婆報到，及後Eason下車會合郭偉亮夫婦，雖然當晚氣溫下降，但他衣衫單薄，還以短褲上陣大晒榕樹腳，反觀郭偉亮穿羽絨，身旁的葉佩雯亦着住大褸。

匿車尾搞鬼

一行三人在車旁傾了一會便步往戲院，期間Eason已凍到縮縮吓，見他沿途急急腳步入戲院，表情多多的他等入場時更頻頻嘴扁扁，又以手掩面。及至凌晨2時許散場，化身「電燈膽」的Eason與郭偉亮兩公婆在街頭抽煙「打邊爐」，Eason吞雲吐霧期間發現記者在場，他即與郭偉亮向鏡頭手指指，及後三人又搞鬼地扮驚，縮低身匿在車尾避鏡頭，不過Eason最終難抵寒風，發揮其「榕樹腳」功效，一邊大喊「好凍呀」，一邊極速狂奔上車閃人。

好凍呀！ 天寒地凍着短褲，難怪陳奕迅邊嗌凍邊跑上車啦！	扁嘴 陳奕迅傾偈時表情多多。	手指指 一發現記者，三人即時指手畫腳扮驚。

文、攝：追蹤組