袁偉豪約撐枱腳箍煲 岑杏賢軟化：順其自然

藝人袁偉豪因無綫劇《城寨英雄》「牙佬」一角爆紅，惟事業得意的他宣布與拍拖三年的港姐女友岑杏賢（Jennifer）分手。Ben事後不時在公開活動流露復合的意願，除講明想追番Jennifer，他在搬離愛巢後，更依然住同一屋苑方便箍煲。Ben前晚在無綫《萬千星輝頒獎典禮2016》中奪得「最受歡迎電視男角色」，在全港觀眾面前激動哽咽多謝Jennifer於背後支持他，出招箍煲：「近呢三年有個朋友喺後面支持我，多謝你Jennifer！」

在後台受訪時，Ben指Jennifer有份擁有該獎，更預告相約食飯慶祝：「3年嘅感情入面佢支持我好多，呢個獎佢都有份。（借機講復合？）男人都係暫時工作為先，大家都係朋友。（幾時約出嚟慶祝？）都要擇個日，依家開緊《使徒2》要深圳香港兩邊走，食飯幾時都得。如果遲啲喺街見到我同Jennifer，請大家高抬貴手。（佢有冇恭喜你？）佢有Send Message畀我，不過未有時間覆。」

舊愛眼濕濕

至於Jennifer回覆本報時，直認特意重溫頒獎禮戥Ben開心，更睇到眼濕濕：「我上去myTV SUPER睇番頒獎禮，每次睇頒獎禮都好感動，睇到每個人攞獎我都會眼濕濕嘅。（前男友公開多謝你會否特別感動？）我有傳短訊恭喜佢，雖然我冇睇直播，但朋友都有短訊我，Update邊個拎咩獎。我都有Send Message恭喜佢，佢攞獎我都好戥佢開心。」

早前將Ben「降呢」稱呼為朋友的她態度明顯軟化，續說：「至於佢話再約我食飯，我覺得順其自然啦。大家各有各忙，佢自己工作都好忙，咁我哋順其自然啦！」得知舊愛態度軟化，復合機會大增的Ben未敢怠慢，明言先做好自己：「目前主要都想做好自己工作先，佢講得啱，感情係需要順其自然嘅。嚟緊大家都有好多工作要面對，呢段時間大家換另一個角色，喺身邊支持，都係好朋友。」睇嚟兩人復合指數甚高，翻撻有望！

成功向Jennifer「盡訴心中情」的Ben，攞獎後他應拍檔王君馨邀請，與出爐視后胡定欣及視帝陳展鵬，齊齊拍片隔空為新婚的岑麗香送祝福。Ben開心祝香香年生貴子，又起哄狂嗌「洞房」：「新婚快樂，快啲生多幾個！洞房！洞房！」定欣幫手催生B：「你睇吓幾犀利，我哋拎咗四個獎嚟同你慶祝！快啲生BB！」為好姊妹香香準備此大禮的王君馨，希望香香喜歡這份新婚禮物。

王君馨3年前續約

早前被視為「最佳女配角」大熱的王君馨，最終「越級」得到「最受歡迎電視女角色」，她稱始料不及：「做演員嘅目標，就係希望觀眾認同。『花曼』呢個角色令觀眾有共鳴感已經好開心，真係意料唔到會攞『最受歡迎電視女角色』，個心只有感恩，係我第一個喺TVB攞嘅獎，我會加倍努力，今次攞唔到（指最佳女配角），咁我咪更加努力做到值得攞為止。（傳你快約滿無綫？）三年前已同公司簽咗長約，之前續約換獎嘅消息係假嘅！」她前晚獲粉絲於電視城外砌字兼送香檳慶祝。

文：影視組