「萬人迷」碧咸（David Beckham）與老婆Victoria的11歲愛子告斯（Cruz）近日首推慈善單曲，歌曲MV前日出爐，四兄弟姊妹包括鮮有上鏡的5歲小公主夏柏舒芬（Harper Seven）都有客串，齊齊玩轉倫敦，Warm爆迎聖誕！
碧咸與「辣妹」Victoria的11歲細仔告斯，日前推出聖誕慈善單曲《If Everyday Was Christmas》正式出道，雖然被名嘴皮爾斯摩根（Piers Morgan）「抽水」批評愛出風頭，而告斯的歌曲亦譭譽參半，但一家繼續齊心谷歌行善。
歌曲前日推出MV，除有主角告斯於倫敦邊唱邊Chok兼賣萌，仲有17歲大哥布魯克林（Brooklyn）、14歲二哥羅密歐（Romeo）與5歲妹妹夏柏舒芬（Harper Seven）及碧咸客串現身！其中一幕見到布魯克林把玩夏柏舒芬的長髮，幾兄弟又於倫敦大笨鐘旁冒雨玩滑板，告斯仲整蠱兩個哥哥，將糖果倒在他們頭上，又大玩聖誕裝飾金粉，互相追逐，Sweet到爆！碧咸與Victoria平日雖會於社交網晒仔女生活搞笑片，不過一直少見夏柏上鏡，今次算為四兄弟姊妹首度公開溫馨生活片段，一家為告斯與行善去到盡，難怪粉絲密密於碧咸夫婦社交網派Like！
文：外娛組