麥德羅 劉麗萍 水底婚禮賀三囍
八十年代舞王麥德羅（Robert）與一手發掘天后容祖兒的「K后」劉麗萍（Apple）情路兜轉，兩人戀愛、分開再相戀，分手25年間各自結婚生子卻又離婚，其後重遇翻撻8年，昨日終於宣布2018年再婚慶祝「三囍臨門」，Robert更打算辦水底婚禮，盡顯「中佬的浪漫」！
現年58歲的舞王麥德羅與人稱「K后」、53歲的BIG ECHO創辦人劉麗萍低調拍拖約8年，兩人昨日隔洋宣布婚訊，定於2018年，即Robert「登六」及入行40周年時結婚，舉行三囍婚禮，有情人終成眷屬！
Apple於20多歲時跟Robert拍拖4年後分手，其後結過兩次婚，育有兩女一子，期間全力發展個人事業，創立BIG ECHO卡拉OK，更發掘了天后容祖兒，早前她重開K場，祖兒亦有神秘現身報答知遇之恩，至於Robert亦曾離婚及育有一子。
患病加深感情
在緣分安排下，這對舊情人在活動上重遇再相愛。雖然Robert多次求婚，無意再婚的Apple卻認為男友只是「講笑」而婉拒，但一次患病入院的經歷，因Apple沒有兒女在身邊，而有Robert無微不至的照顧，令她深受打動改變初衷。
記者昨日聯絡現時在馬來西亞工作的一對準新人，Apple坦言傳婚訊後收到很多祝福，而婚禮會全權交由男友計劃：「我諗等佢安排啦！我唔知呀！」又大讚Robert鬼主意多多，每次觸怒她都表示要結婚，曾試過買戒指求婚，又會幻想夢想婚禮，她大爆Robert的「浪漫宣言」：「佢話我哋不如喺馬來西亞水底結婚啦！因為佢好鬼鍾意潛水，我話我潛水唔得喎，佢就話教練啫！有時講吓笑點樣結婚嗰啲囉。」
60大壽有驚喜
至於Robert表示準備結婚，但要女友再多等一年多，全因他想有個美滿回憶：「等我60歲大壽嗰日，仲有年幾，我就計劃向Apple求婚，到時我希望畀個驚喜佢嘅！（幾時復合？）我哋失散25年，復合咗7、8年。」又表示一定會為女友炮製驚喜，他蠱惑地說：「唔急，唔通知佢住，到時大家就會收到（口架）啦！」
文：音樂組