婷婷預告唔捧場：好多人問我攞飛
【車綺敏上海直擊】樂壇天后王菲上海演唱會門票傳炒至百萬元，前晚謝婷婷到上海出席活動時透露不少人向她索飛，但她表示因工作，屆時將不能捧場。而昨日王菲的綵排視頻流出，有網友笑言看完視頻，等如賺了數十萬。
藝人謝婷婷、內地女星唐嫣、名模裴蓓、陳碧舸、江疏影、著名形象指導郭慶彬（Ricky）等前晚現身上海展覽中心出席Max Mara 2017早秋系列全球發布首個時裝展。婷婷表示前日凌晨起身化妝整頭趕搭早機來撐場，並稱近來工作忙得很開心：「我平時係唔瞓覺嘅人，所以個人多啲嘢做愈健康，因為會食得健康啲，同埋我冇嘢做都唔瞓覺㗎，仲係咁食薯片、薯條、炸嘢。」
郭慶彬「逼供」問緋聞
提到兄長謝霆鋒女友王菲12月30日將於上海舉行「王菲幻樂一場2016」演唱會，傳孖位門票價炒至百萬人民幣，單位亦傳炒至60萬人仔，婷婷透露不少人向她索飛，她說：「我唔會睇。（以為你會約哥哥同王菲食餐飯！）我都以為我會喺上海，好多人問我攞飛。」而昨日王菲為演唱會綵排的視頻於網上流出，有網友笑說：「睇完視頻，真係賺咗幾十萬！」婷婷又透露希望聖誕節可與家人度過，但不會買禮物：「我好叻買禮物畀人，但一買嘢畀屋企人就唔叻。」
早前傳暗撻荷里活男星「鷹眼」謝洛美維拿（Jeremy Renner）的婷婷，問到聖誕假期會否約對方見面？她甜笑說：「唔講佢啦！唔知啊！（見吓？）唔會啩？佢有阿女，佢有個BB嘛。（咁有冇發展空間？）依家（講）仲好早，有Keep住聯絡。」問到婷婷是否屬閃婚之人？她表示可能會有衝動結婚，但必定會先告知父母：「一定唔可以結完先講佢哋聽。（結婚拍拖會開心share定低調？）我每段感情都睇對方，會就吓佢，唔想相處有磨擦。」
而郭慶彬一見好友婷婷即攬頭攬頸，問可知她的緋聞？Ricky說：「佢哋好襯，我都希望佢快啲拍拖，要向佢嚴刑逼供先。」另外，日前於33歲生日公開與電視劇《錦繡未央》男星羅晉戀情的唐嫣，問到心情是否很幸福？她說：「挺好的，謝謝。」言畢便被工作人員拉走。
文：名人組